-
-
صدر مملکت آصف علی زرداری، وزیراعظم شہباز شریف اور مسلح افواج نے آج پاکستان کے 79ویں یوم آزادی پر مبارک باد دیتے ہوئے اپنے الگ الگ پیغامات جاری کیے ہیں۔
وزیراعظم شہباز شریف کا یومِ آزادی پر پیغام
ایکس پر اپنے پیغام میں وزیراعظم شہباز شریف نے کہا: ’میں بابائے قوم قائداعظم محمد علی جناح اور مفکرِ پاکستان علامہ محمد اقبال کو خراجِ عقیدت پیش کرتا ہوں جنہوں نے تحریکِ آزادی کے دیگر پرعزم قائدین اور کارکنان کے ساتھ مل کر قوم کو ایک وژن، ایک مشن اور ایک مقصد کے تحت متحد کیا۔ ان کی انتھک جدوجہد نے تاریخ کا دھارا بدل دیا اور ایک آزاد، نظریاتی ریاست کے قیام کے ذریعے بظاہر ناممکن دکھائی دینے والے خواب کو حقیقت میں بدل دیا۔‘
وزیراعظم نے کہا کہ ’گذشتہ 78 برس ہمارے عزم، مضبوط ایمان اور روشن مستقبل کی امید کی داستان سناتے ہیں، جب ہم نے ایک قوم کی حیثیت سے کئی کٹھن چیلنجز کا مقابلہ کیا۔ اس کے باوجود پاکستان نے ہر شعبے میں کامیابی اور کارکردگی کی کئی بلندیاں حاصل کیں۔‘
انہوں نے مزید کہا کہ ’انڈیا کی مسلط کردہ چار روزہ جنگ میں معرکہ حق میں پاکستان کی تاریخی فتح نے نہ صرف ہماری آزادی کے تقدس کو مزید مضبوط کیا بلکہ قوم کے دلوں میں ایک نیا جذبہ، ولولہ اور قومی روح کو بیدار کر کے اس یوم آزادی کا فخر اور جوش کئی گنا بڑھا دیا۔‘
بقول وزیراعظم: ’اللہ تعالیٰ کے فضل و کرم سے، ہماری بہادر مسلح افواج نے اپنی ماضی کی عظمت کو دوبارہ زندہ کیا اور ایک بُنیان مرصوص یعنی فولادی دیوار کی مانند دشمن کے جھوٹے غرور کو توڑ ڈالا۔ ہماری جری افواج اور فضا کے شیر دل سپاہیوں کی عسکری صلاحیت، شجاعت اور ایمان نے دشمن کو گھٹنے ٹیکنے پر مجبور کیا۔‘
I extend my heartfelt felicitations to the nation on completion of 78 years of independence of Pakistan.
I pay tribute to Father of the Nation, Quaid-i-Azam Muhammad Ali Jinnah, and the Thinker of Pakistan, Allama Muhammad Iqbal, who along with other resolute leaders and…
— Shehbaz Sharif (@CMShehbaz) August 14, 2025
ان کا مزید کہنا تھا کہ ’یہ فتح محض ایک عسکری کامیابی نہیں تھی بلکہ دو قومی نظریے کی صداقت کی جیت بھی تھی، جو ہمارے پیارے وطن کی بنیاد ہے۔ اسی جذبے کے ساتھ ہم اپنے قومی مفادات، بشمول آبی وسائل، کے تحفظ اور دفاع کے لیے چوکس ہیں۔‘
وزیراعظم نے اپنے پیغام میں پاکستان کی خودمختاری کے تحفظ کے عزم کا اظہار کرتے ہوئے کہا کہ ہم ایک پرامن قوم کے طور پر پرامن بقائے باہمی کے اصولوں اور خطے و دنیا کے مسائل کو مکالمے اور سفارت کاری کے ذریعے حل کرنے پر اپنے یقین کا اعادہ کرتے ہیں۔ انڈیا کو بھی تمام تنازعات، بشمول جموں و کشمیر کے مسئلے کے حل کے لیے یہی عزم دکھانے کی ضرورت ہے۔
مزید پڑھیں:ملک بھر میں آج 79واں یوم آزادی ملی جوش و جذبے کے ساتھ منایا جارہا ہے
صدر مملکت آصف علی زرداری کا یومِ آزادی پر پیغام
صدر مملکت آصف علی زرداری نے پاکستان کی 79ویں یومِ آزادی کے موقعے پر ملک میں اور دنیا بھر میں بسنے والے تمام پاکستانیوں کو دل کی گہرائیوں سے مبارک باد پیش کرتے ہوئے کہا کہ ’اس سال ہم یوم آزادی بڑے افتخار اور ایک تازہ امید کے ساتھ منا رہے ہیں۔‘
سرکاری خبر رساں ادارے ایسوسی ایٹڈ پریس آف پاکستان (اے پی پی) کے مطابق صدر مملکت نے اپنے بیان میں کہا: ’حال ہی میں ہماری قوم نے بیرونی جارحیت کے جواب میں اپنی طاقت، عزم اور اتحاد کا مظاہرہ کیا، معرکہ حق اور آپریشن بنیان مرصوص میں ہماری فتح ہماری تاریخ کا ایک سنہری باب ہے، یہ کامیابی غیر متزلزل قومی عزم، بے مثال پیشہ ورانہ مہارت اور پوری قوم کے اتحاد کا ثبوت ہے۔‘
صدر مملکت نے کہا کہ’ انڈیا کی بلاجواز جارحیت کے جواب میں ہم نے تحمل، حکمت اور بھرپور قوت سے اپنے وطن کا دفاع کیا، دنیا نے دیکھا کہ پاکستان امن چاہتا ہے، مگر اپنی خودمختاری اور علاقائی سالمیت کے تحفظ کی مکمل صلاحیت رکھتا ہے۔‘
انہوں نے مزید کہا کہ ’آج دنیا پاکستان کو ایک ایسے ملک کے طور پر دیکھتی ہے جو امن کا خواہاں ہے مگر دباؤ کے آگے نہیں جھکتا، لیکن یہ لمحہ صرف عسکری کامیابی نہیں، بلکہ اس امر کی بھی یاددہانی کرواتا ہے کہ جب ہم متحد، یکسو اور ایک مشترکہ مقصد کے لیے پرعزم ہوں تو ہم ہر شعبے میں کامیابی حاصل کر سکتے ہیں۔‘
مسلح افواج کی یوم آزادی پر قوم کو مبارک باد
پاکستان کی مسلح افواج نے بھی قوم کو ملک کے 79ویں یوم آزادی کے موقعے پر مبارک باد پیش کی ہے۔
پاکستان فوج کے شعبہ تعلقات عامہ (آئی ایس پی آر) کی جانب سے جاری کیے گئے بیان میں کہا گیا: ’مسلح افواج ان رہنماؤں، مدبر سیاست دانوں اور جانباز سپاہیوں کو پُرعقیدت سلام پیش کرتی ہیں جنہوں نے ہمارے وطن کی بنیادیں رکھیں اور ان کے ورثے کو گہری عقیدت اور شکرگزاری کے ساتھ یاد رکھتی ہیں۔‘
مزید کہا گیا ’قومی سلامتی کے محافظ ہونے کے ناطے ہم پاکستان کی خودمختاری اور علاقائی سالمیت کے تحفظ، آئین کی پاسداری اور ان اقدار کے دفاع کے لیے اپنے غیر متزلزل عزم کا اعادہ کرتے ہیں جو ہماری قومی شناخت کی اساس ہیں۔‘
آئی ایس پی آر کا مزید کہنا تھا ’مسلح افواج اور عوام کے درمیان اٹوٹ رشتہ ہماری اجتماعی طاقت کی بنیاد ہے۔ اس یومِ آزادی پر آئیں ہم اپنے عزم کو تازہ کریں کہ امن، ترقی اور اتحاد کے لیے کوششیں جاری رکھیں اور ایمان، اتحاد اور قربانی کے اصولوں پر کاربند رہتے ہوئے ایک مضبوط، خوش حال اور ترقی یافتہ پاکستان کے خواب کو حقیقت میں بدلیں۔‘
