-
-
کراچی میں منشیات کی سپلائی آن لائن اور کوریئر سروسز کے ذریعے کیے جانے کا انکشاف ہوا ہے۔
آئی جی پولیس سندھ غلام نبی میمن نے جیونیوز سے گفتگو کرتے ہوئے کہا ہےکہ منشیات کی سپلائی آن لائن اور کوریئر سروسز سے کیے جانے کی نشاندہی ہوئی ہے جس پر حکمت عملی تیار کر رہے ہیں۔
غلام نبی میمن نے کہا کہ منشیات کے بڑے ڈیلرز اور سپلائرز کو ٹارگٹ کرکے ان کے سپلائی چین توڑنے کیلئے پولیس افسران کو ٹاسک دیے گئے ہیں۔ آئی جی سندھ نے کہا کہ اے کیٹگری کے 137 میں سے 37 منشیات کے جرائم میں ملوث اہم ملزمان کو گرفتار کیا گیا ہے۔
انہوں نے کہا کہ منشیات کی ترسیل کو روکنے کے لیے مؤثر انٹیلی جنس اور صوبے کے بارڈر پر میکنزم بہتر کرنا ہوگا۔ آئی جی سندھ کا کہنا تھا کہ سندھ میں منشیات کی روک تھام کے لیے سخت قانون بنایا گیا ہے جس کیلئے پولیس، محکمہ ایکسائز اور اے این ایف کے ساتھ مل کر کام کر رہی ہے، انفورسمنٹ کے ساتھ ڈرگ ڈیمانڈ ریڈکشن پرکام کرنے کے بہتر اثرات سامنے آئیں گے۔
مزید پڑھیں:میئر کراچی کا عوامی مقامات پر منشیات کے عادی افراد کے خلاف کریک ڈاؤن کا حکم
آئی جی سندھ غلام نبی میمن نے مزید کہا کہ تعلیمی اداروں میں منشیات کی روک تھام پرسخت کارروائی کر رہے ہیں، تعلیمی اداروں میں منشیات کی روک تھام کیلئے والدین اور تعلیمی اداروں کی انتظامیہ کا کردار انتہائی اہم ہے۔
انہوں نے کہا کہ والدین اور تعلیمی اداروں کی انتظامیہ بچوں کے رویے کو بہتر طور پر جان سکتے ہیں، والدین بچوں کے غیر معمولی رویے کو اور معلومات کو پولیس سے ضرورشیئر کریں، طلبا تک منشیات پہنچنے پر تعلیمی اداروں کو بھی معاملے کو رپورٹ کرنا چاہیے تاکہ تدارک کیا جاسکے۔
