-
-
پنجاب بھر میں طوفانی بارشوں نے تباہی مچادی ہے، اسلام آباد اور راولپنڈی میں گزشتہ روز سے بارش کا سلسلہ جاری ہے، راولپنڈی میں 230 ملی میٹر بارش ریکارڈ کی جاچکی ہے جس کے باعث نالہ لئی میں پانی کی سطح خطرناک حد تک بلند ہونے پر سائرن بجادیے گئے۔
پاک فوج نالہ لئی کی صورتحال کا جائزہ لینے گوالمنڈی پل پہنچ گئی،چکوال میں کلاؤڈ برسٹ ہونے سے 423 ملی میٹر بارش برس گئی، پی ڈی ایم اے نے آج بھی پنجاب بھر میں بارش کی پیشگوئی کردی۔
اسلام آباد اور راولپنڈی میں گزشتہ 15 گھنٹوں سے بارش جاری ہے، راولپنڈی میں اب تک 230 ملی میٹربارش ریکاڈ کی جاچکی ہے، چکلالہ کے مقام پر 188 ملی میٹر، بوکرا 160 اور گولڑا میں 150 ملی میٹر بارش رکارڈ کی گئی، شدید بارش کے باعث نشیبی علاقے زیرآب آگئے، سڑکوں اور گلیوں میں سیلابی منظر پیش کرنے لگا۔
اسلام آباد ائیرپورٹ 110 ملی میٹر اور گولڑہ میں 100 ملی میٹر، زیرپوائنٹ پر84، سید پور میں 82، کچہری کے مقام پر 133، پیرودھائی 102 ملی میٹر اور کٹاریاں 92 میٹر بارش ریکارڈ کی گئی۔
نالہ لئی کی سطح خطرناک حد تک بلند، سائرن بج گئے:
راولپنڈی میں مسلسل بارش کے باعث نالہ لئی نیو کٹاریاں کے مقام پر پانی کی سطح 17 فٹ جبکہ گوالمنڈی کے مقام پر پانی کی سطح 18 فٹ تک پہنچ گئی، نالہ لئی میں پانی کا خطرناک حد لیول 20 فٹ ہے، نالہ لئی میں صرف 2 فٹ پانی کی گنجائش باقی ہے۔
مزید پڑھیں:کراچی میں آج بھی بارش کا امکان، کون کونسے علاقوں میں بارش ہوسکتی ہے؟
نالہ لئی کی سطح بلند ہونے کے باعث خطرے کے سائرن بجادیے گئے ہیں جبکہ پاک فوج نالہ لئی کی صورتحال کا جائزہ لینے گوالمنڈی پل پہنچ گئی، نالہ لئی کے اطراف کی مساجد سے اعلانات کا سلسلہ بھی جاری ہے۔ راولپنڈی کنٹونمنٹ اور چکلالہ کنٹونمنٹ بورڈ کی جانب سے نالہ کی صفائی نہ ہونے پر بارشی پانی گھروں میں داخل ہوگیا، بحریہ ٹاون فیز8 میں نالے کا پانی سڑکوں پرآگیا۔
سیلابی صورتحال کے بعد راولپنڈی میں چھٹی کا اعلان
شدید بارشوں اور سیلابی صورتحال کے بعد ضلع راولپنڈی میں ایک دن کی چھٹی کا اعلان کردیا گیا ہے، ڈپٹی کمشنر راولپنڈی نے چھٹی کا نوٹیفکیشن جاری کردیا۔ سماجی رابطے کی ویب سائٹ پر اپنے پیغام میں ڈپٹی کمشنر راولپنڈی نے عوام سے اپیل کی کہ وہ گھروں میں رہیں اور غیر ضروری باہر نہ نکلیں۔
سیلابی صورتحال، وزیر اعظم شہباز شریف نے ہنگامی اجلاس طلب کر لیا
راولپنڈی میں سیلابی صورتحال پر وزیر اعظم شہباز شریف نے ہنگامی اجلاس طلب کر لیا ہے۔ میڈیا رپورٹ کے مطابق وزیر اعظم نے ایم ڈی واسا، کمشنر، ڈپٹی کمشنر اور چیف سیکریٹری پنجاب سے رپورٹ بھی طلب کر لی ہے۔
سیلاب میں پھنسی فیملی کو نکالنے کیلئے ہیلی کاپٹر پہنچ گیا
راولپنڈی میں چکری روڈ گاؤں لادیاں میں سیلاب میں ایک فیملی بچوں سمیت چھت پر پھنس گئی۔ ریسکیو حکام کے مطابق چھت پر پھنسی فیملی کو نکالنے کے لیے ہیلی کاپٹر پہنچ گیا ہے۔ ریسکیو 1122 کی جانب سے آپریشن کر کے 11 لوگوں کو ریسکیو کرلیا گیا ہے جبکہ دیگر افراد کو ریسکیو کرنے کا عمل جاری ہے
شدید بارشوں کے سبب فلائٹ آپریشن متاثر
پاکستان کے دارالحکومت اسلام آباد میں شدید بارشوں کے سبب فلائٹ آپریشن متاثر ہوا ہے جس کے پیشِ نظر متعدد فلائٹس متبادل شہروں میں اتارلی گئیں ہیں۔
تفصیلات کے مطابق دبئی سے اسلام آباد کے لیے غیر ملکی ایئر لائن کی پرواز ایف زیڈ 353 کو سیالکوٹ موڑا گیا۔ قومی ایئرلائن کی العین سے اسلام آباد کی پرواز کی سیالکوٹ میں لینڈنگ کروائی گئی۔
سعودی عرب کے شہر ریاض سے اسلام آباد کی نجی ایئر لائن کی پرواز کی اسلام آباد کے بجائے فیصل آباد میں لینڈنگ کروائی گئی۔ اسلام آباد سے لندن، دبئی، دوحا، باکو، مسقط جانے والی پروازوں کی روانگی تاخیر کا شکار ہے، اسلام آباد سے ریاض، ابوظبی، استنبول، کویت اور کراچی کی پروازیں بھی تاخیر کا شکار ہیں۔
