-
-
ڈیجیٹل ترقی کے سفر میں دنیا کے ساتھ قدم سے قدم ملا کر چلنے ، جدید ٹیکنالوجی کو ہر طبقے تک پہنچانے اور نوجوانوں کو عالمی معیار کی مہارت فراہم کرنے کا عزم ، حکومت نے قومی آرٹیفشل انٹیلی جنس کی ترقی کا منصوبہ شروع کرنے کا اعلان کیا ہے۔
سرکاری دستاویز کے مطابق قومی اے آئی منصوبے کے لیے53 کروڑ 46 لاکھ روپے مختص کیے گئے ہیں، منصوبے کے تحت وزارت آئی ٹی ملک بھر میں اے آئی حب اور تربیتی مراکز قائم کرے گی، 7 شہروں میں نیشنل انکیوبیشن سینٹرز میں اے آئی حب قائم ہوں گے۔
منصوبے کے تحت 20 ہزار طلبہ و طالبات کو اے آئی تربیت دی جائے گی، 150 اسٹارٹ اپس کو اے آئی گرانٹس دی جائیں گی۔ جبکہ 500 پروفیشنلز کو اے آئی تربیت دینے کا ہدف مقرر کیا گیا ہے۔
مالی سال 2025-26 کے اہداف میں 2 اے آئی حب، 3 ہزار تربیتی ورکشاپ،اور2 آگاہی سیشن کا انعقاد شامل ہے، منصوبے کے تحت شفاف اور منصفانہ اے آئی گورننس کی حکمت عملی اپنائی جائے گی۔
منصوبہ ڈیجیٹل پاکستان ویژن سے ہم آہنگ ہوگا، منصوبے کا مقصد اے آئی اسکلز، تربیت اور گورننس کو فروغ دینا ہے۔وزارت آئی ٹی اینڈ ٹیلی حکام کے مطابق قومی اے آئی منصوبے کے لیے پلاننگ کمیشن نے پی سی ون کی منظوری دے دی ہے۔
