-
-
نئی داخلہ پالیسی کی منظوری کی بعد کراچی کے 154سمیت سندھ بھر کے375 کالجزمیں انٹر میڈیٹ سال اول میں داخلوں کا آغازہوگیا، داخلوں کا سلسلہ 15 جون سے 15 جولائی تک جاری رہے گا ۔ جسکے بعد22 جولائی سے فہرستیں آویزاں کردی جائیں گی، داخلہ فارم میں ڈومیسائل کی شرط ختم کر دی گئی۔
کالج ایجوکیشن ڈپارٹمنٹ سندھ کی نئی داخلہ پالیسی کے تحت تعلیمی سال 2025-26 کے لیے نائین کلاس کے امتحانی نتائج کی بنیاد پر انٹر سال اول میں داخلہ لینے کی اجازت دی گئی ہے۔ اس پالیسی کا اطلاق سندھ الیکٹرانک سینٹرلائزڈ کالج ایڈمیشن پروگرام میں حصہ لینے والے سرکاری کالجوں پر لاگو ہوتا ہے۔کیمرج سسٹم کے طلباء کو کلاس او لیول پارٹ-I کے نتائج کی بنیاد پر داخلہ دیا جائے گا۔
حکام کے مطابق آن لائن درخواستیں SECCAP پورٹل
www.seccap.dges.gos.pk
کے ذریعے 15 جولائی 2025 تک قبول کی جائیں گی، گیارہویں اور بارہوں جماعت کی کلاسز کا آغاز اگست 15 سے ہوگا ۔ نوٹیفکیشن کے مطابق کراچی ریجن میں کالج زون سسٹم نافذ العمل رہے گا۔ اس نظام کے تحت، طلباء کو عام طور پر ان کے نامزد زون کے اندر کالجوں میں داخلہ دیا جائے گا۔ تاہم، جن طلباء نے A+ یا A گریڈ حاصل کیے ہیں وہ اپنی پسند کے کسی بھی کالج میں درخواست دینے کے اہل ہوں گے، جب کہ B سے E گریڈ کے حامل طلباء کو اپنے مختص زون میں درخواست دینی ہوگی۔
کراچی، حیدرآباد، میرپورخاص، شہید بینظیر آباد، سکھر اور لاڑکانہ کے کالجز کے ریجنل ڈائریکٹرز اپنے اپنے ڈویژنز میں جبکہ ڈی جی کالجز، سندھ صوبے بھر میں اس عمل کی نگرانی کریں گے۔ ڈی جی کالجز کا آئی ٹی سیکشن فہرستیں تیار کرنے کا ذمہ دار ہوگا، جو SECCAP کمیٹی کے چیئرمین کی منظوری سے مشروط ہے۔ فہرستیں شائع ہونے کے بعد طلباء کے کسی بھی قسم کے خدشات کو دور کرنے کے لیے صوبے بھر میں مخصوص کلیم سینٹرز قائم کیے جائیں گے۔
وہ طلبا جو پہلے داخلہ لے چکے ہیں انہیں درخواست دینے سے قبل پہلا داخلہ منسوخ کرنا ہوگا۔ جبکہ پانچ سال سے زیادہ کا وقفہ رکھنے والے امیدوار درخواست دینے کے اہل نہیں ہوں گے۔
