عید الاضحی ، کن افراد یا تنظیموں کا کھال جمع کرنے کی اجازت ہو گی ؟

محکمہ داخلہ سندھ نے عید الاضحی پر قربانی کی کھالیں جمع کرنے کا ضابطہ اخلاق جاری کر دیا۔ ایڈیشنل چیف سیکریٹری سندھ کی جانب سے جاری نوٹیفیکشن کے مطابق قربانی کی کھالیں جمع کرنے کی اجازت صرف رجسٹرڈ اداروں اور جماعتوں کو ہی ہو گی۔

قربانی کی کھالیں جمع کرنے کے لیے کمشنر  یا ڈپٹی کمشنر کا اجازت نامہ ضروری ہوگا۔ کھالیں جمع کرنے کی اجازت دیتے وقت نیکٹا کی جاری ایس اوپیز کا خیال رکھاجائے۔ کمشنر، ڈپٹی کمشنرز اس بات کو یقینی بنائیں گے کہ صرف رجسٹرڈ جماعتیں یا ادارے ہی کھالیں جمع کریں۔

نوٹیفکیشن کے مطابق کھالیں جمع کرنے کے لیے کیمپ یا بینر لگانے کی اجازت نہیں ہو گی۔ گاڑیوں پر پارٹی پرچم،یا لاؤڈ اسپیکر کے ذریعے اعلان کرکے بھی کھالیں جمع کرنے کی اجازت نہیں ہوگی۔ شہریوں سے زبردستی کھالیں وصول  کرنے کا عمل کسی صورت برداشت نہیں کیاجائے گا۔ کھالیں جمع کرتے وقت کمشنر و ڈپٹی کمشنر کا اجازت نامہ ساتھ رکھنا ضروری ہوگا۔

 ضابطہ اخلاق کی خلاف ورزی کرنے والوں کے خلاف سخت کارروائی کی جائے گی۔ قانون ی کی خلاف ورزی کرنے والے اداروں ،تنظیموں کی جمع شدہ کھالیں ضبط کر کے عطیہ کر دی جائیں گی۔ قانون ناٖفذ کرنے والے اداروں کو ضابطہ اخلاق کی پابندی یقینی بنانے کے لئے متعلقہ ادارے یا شخص کی جانچ کرنے کی اجازت ہو گی۔

کمشنر،ڈپٹی کمشنر کو اجتماعی قربانی کی اجازت دینے کا بھی اختیار ہوگا۔ محکمہ داخلہ سندھ کے مطابق 10 سے 12 ذی الحج تک اسلحہ ساتھ لے کر چلنے کےتمام اجازت نامے بھی معطل رہیں گے۔