فیلڈ مارشل سیدعاصم منیر کا لائن آف کنٹرول کا دورہ، فرنٹ لائن پر تعینات جوانوں کے ساتھ عید منائی

چیف آف آرمی اسٹاف فیلڈ مارشل سید عاصم منیر، نشان امتیاز نے عید الاضحیٰ کے موقع پر لائن آف کنٹرول کے فرنٹ لائن مورچوں کا دورہ کیا اور وہاں تعینات جوانوں کے ساتھ عید منائی۔

فیلڈ مارشل نے جوانوں کے ساتھ نماز عید ادا کی جس میں پاکستان کے پائیدار امن، استحکام اور ترقی کے لیے خصوصی دعائیں کی گئیں، جبکہ وطن کے دفاع میں اپنی جانیں قربان کرنے والے شہداء کو خراجِ عقیدت پیش کیا گیا۔

جوانوں کو عید کی مبارکباد

آرمی چیف نے افسروں اور جوانوں کو عید کی دلی مبارکباد دیتے ہوئے ان کی پیشہ ورانہ صلاحیتوں، استقامت اور چیلنجز کے باوجود خدمت کو سراہا۔ انہوں نے کہا کہ “فرنٹ لائن پر عید منانا اس قومی فرض کی عکاسی کرتا ہے جس کے تحت ہمارے سپاہی سال بھر مادرِ وطن کے دفاع کے لیے ہمہ وقت تیار رہتے ہیں۔”

فیلڈ مارشل عاصم منیر نے “معرکہ حق” اور “آپریشن بنیان مرصوص” میں جوانوں کی شاندار کارکردگی پر خراج تحسین پیش کیا اور ان شہداء و غازیوں کی قربانیوں کو یاد کیا جنہوں نے ملک کے تحفظ کو یقینی بنایا۔

انہوں نے کہا، کہ پاک فوج کے جوانوں نے معصوم پاکستانی شہریوں بشمول بچوں، خواتین اور بزرگوں کی جانوں کے ضیاع کا بھرپور جواب دیا اور دشمن کو واضح پیغام دیا۔

جوانوں سے گفتگو

سپاہیوں سے گفتگو کرتے ہوئے آرمی چیف نے ان کی بلند حوصلے، آپریشنل تیاری اور دشمن کی کسی بھی جارحیت کا مؤثر جواب دینے کی صلاحیت کو سراہا۔

انہوں نے بھارتی فائر بندی کی خلاف ورزیوں کا مؤثر جواب دینے میں فوج کی صلاحیت پر مکمل اعتماد کا اظہار کرتے ہوئے کہا کہ پاکستان کی مسلح افواج ہر طرح کی جارحیت کا فیصلہ کن جواب دینے کے لیے مکمل طور پر تیار ہیں۔

کشمیر کے حوالے سے آرمی چیف نے واضح کیا کہ بھارت کے غیر قانونی قبضے کے خلاف کشمیری عوام کی بہادرانہ جدوجہد کو کبھی فراموش نہیں کیا جائے گا۔ انہوں نے مسئلہ کشمیر کے اقوام متحدہ کی قراردادوں اور کشمیری عوام کی خواہشات کے مطابق حل کی اہمیت پر زور دیا۔