-
-
وزیراعلیٰ سندھ سید مراد علی شاہ کی زیر صدارت اہم اجلاس میں کراچی کے ٹرک اسٹینڈ کی منتقلی اور کراچی کوسٹل ڈیولپمنٹ زون پر عملدرآمد تیز کرنے کا فیصلہ کیا گیا ہے۔
اجلاس میں فیصلہ کیا گیا کہ ٹرک اسٹینڈ کی نئی جگہ کے تعین کے لیے ایڈووکیٹ جنرل سندھ اور کمشنر کراچی کی سربراہی میں ایک کمیٹی قائم کی گئی ہے، جس میں کراچی پورٹ ٹرسٹ (KPT) کے نمائندے بھی شامل ہوں گے۔ کمیٹی نئی جگہ تجویز کر کے منظوری کے لیے وزیراعلیٰ کو پیش کرے گی۔
اجلاس میں چائنا روڈ اینڈ برج کارپوریشن نے 3.1 ارب ڈالر مالیت کے کراچی کوسٹل ڈیولپمنٹ زون منصوبے پر تفصیلی بریفنگ دی، جو کہ وفاقی حکومت کے ساتھ مفاہمتی یادداشت (MoU) کے تحت مشترکہ منصوبہ ہے۔
منصوبے کی اہم خصوصیات:
مچھر کالونی کے قریب زمین پر کاروباری زون، صنعتی بستی اور ریسرچ سینٹر کا قیام
شپنگ ٹرمینل اور سمندری پانی کو میٹھا بنانے کا پلانٹ
687 ایکڑ رقبے پر تین مراحل میں منصوبے پر عمل درآمد
کسی بھی انسانی بستی کو متاثر کیے بغیر روزگار کے وسیع مواقع پیدا ہوں گے
وزیراعلیٰ نے واضح کیا کہ تمام فنی جائزے مکمل ہو چکے ہیں، جبکہ زمین سے متعلقہ مسائل کے حل کے لیے صوبائی وزیر سید ناصر حسین شاہ، میئر کراچی مرتضیٰ وہاب، اور کمشنر کراچی حسن نقوی پر مشتمل کمیٹی تشکیل دے دی گئی ہے۔ وفاقی وزارت بحری امور بھی جلد اپنا نمائندہ مقرر کرے گی۔
