پاکستان امن کی خاطر بھارت سے بات چیت کیلیے تیار ہے، وزیراعظم

تہران میں وزیراعظم شہبازشریف اور ایرانی صدر ڈاکٹر مسعود پزشکیان کی مشترکہ نیوز کانفرنس ہوئی، جس میں وزیراعظم شہباز شریف نے کہا ہے کہ پاکستان پُرامن مقاصد کیلئے ایران کے ایٹمی پروگرام کی حمایت کرتا ہے، خطے میں امن کی خاطر بھارت کیساتھ سنجیدہ مذاکرات چاہتے ہیں۔

وزیراعظم نے کہا کہ ہم امن کے خواہاں ہیں اور مسئلہ کشمیر سمیت تمام تنازعات کے مذاکرات کے ذریعے حل کے خواہاں ہیں، تنازع کشمیر اقوام متحدہ کی قراردادوں کے مطابق حل کیا جائے۔ ہم امن کیلئے ہمسایوں کے ساتھ پانی کے تنازع، تجارت کے فروغ اور انسداد دہشت گردی پر مذاکرات کیلئے تیار ہیں لیکن اگر سنجیدگی کا مظاہرہ کیا جائے۔

انہوں نے کہا کہ اگر جارحیت کا راستہ اختیار کیا گیا تو پھر ہم اپنے ملک اور علاقائی سالمیت کا دفاع کرینگے، غزہ کی صورتحال انتہائی تشویشناک ہے، ہم اسکی مذمت کرتے ہیں، 50 ہزار سے زائد فلسطینی شہید ہو چکے ہیں، عالمی برادری کو خطے میں فوری اور دیرپا جنگ بندی کیلئے اپنا اثرورسوخ استعمال کرنا چاہئے۔۔

انہوں نے کہا کہ ایران کیساتھ تجارت 10ارب ڈالر تک بڑھانا چاہتے ہیں، پاک ایران مضبوط اقتصادی تعلقات پورے خطے کیلئے فائدہ مند ہو سکتے ہیں، فلسطین اور کشمیر کے مسائل کے منصفانہ حل کے بغیر خطے میں امن قائم نہیں ہو سکتا، بھارتی جارحیت پر ایران کی حمایت کیلئے شکر گزار ہیں۔

مزید پڑھیں:ایران میں قتل کیے گئے 8 پاکستانیوں کی میتیں بہاولپور پہنچا دی گئی

مشترکہ پریس کانفرنس کرتے ہوئے وزیراعظم شہباز شریف نے مزید کہا کہ برادر ملک ایران کا دورہ کرکے دلی خوشی ہوئی، ایران ہمارا دوسرا گھر ہے، اپنے اور اپنے وفد کے بھرپور اور گرمجوش استقبال پر شکریہ ادا کرتا ہوں۔ انہوں نے کہا کہ دونوں بھائی اور ہمسایہ ملک کو تجارت، سرمایہ کاری سمیت تمام شعبوں میں تعاون کو بڑھانا چاہتے ہیں۔

ایرانی صدر مسعود پزشکیان نے کہا کہ شہباز شریف نےکہا ہے کہ پاکستان کے عوام اپنے ایرانی بھائیوں کے ساتھ ہیں اور پاکستان عوامی اور پرامن مقاصد کے لیے ایران کے ایٹمی پروگرام کی حمایت کرتا ہے۔ ایرانی صدر ڈاکٹر مسعود پزشکیان نے وزیراعظم شہباز شریف اور ان کے رفقا کو خوش آمدید کہتے ہوئے کہا کہ دونوں ملکوں کے صدیوں پر محیط ثقافتی اور تاریخی تعلقات ہیں۔

انھوں نے کہا کہ وزیراعظم شہباز اور ان کے وفد کے ساتھ گفتگو میں سیاست، معیشت، بین الاقوامی تعلقات سمیت مختلف شعبوں میں تعاون پر بات ہوئی۔ مسعود پزشکیان نے کہا کہ ’ہم اس بات پر یقین رکھتے ہیں کہ دونوں ممالک کی مشترکہ سرحد پر کوئی بھی دہشتگردانہ اور مجرمانہ سرگرمی نہیں ہونی چاہیے، اور اس سلسلے میں سرحدی علاقوں میں تعاون کو فروغ دینے کی ضرورت ہے۔‘

وزیراعظم کی ایرانی سپریم لیڈر سید علی خامنہ ای سے ملاقات:

وزیراعظم محمد شہباز شریف نے ایران کے سپریم لیڈر سید علی خامنہ ای سے ملاقات کی اور انہیں پاکستان ایران تعلقات کے فروغ کیلئے کیے گئے اقدامات سے آگاہ کیا، آیت اللہ علی خامنہ ای نے غزہ میں صیہونی حکومت کے جاری مظالم کے خاتمے کیلئے ایران اور پاکستان کی مشترکہ اور موثر کوششوں کی ضرورت پر زور دیا۔

سپریم لیڈر نے دور اندیشی کے ساتھ علاقائی امن و استحکام کے فروغ کیلئے وزیر اعظم شہباز شریف کی کوششوں کو سراہا۔

Web Desk