-
-
سندھ کے وزیر برائے ایکسائز اینڈ ٹیکسیشن، مکیش کمار چاولہ نے اعلان کیا ہے کہ صوبے بھر میں گاڑیوں کی رجسٹریشن اور نئی نمبر پلیٹس کے اجرا کی حتمی تاریخ میں 30 جون 2025 تک توسیع کر دی گئی ہے۔
اس سے قبل یہ ڈیڈ لائن 3 اپریل اور بعد ازاں 15 مئی مقرر کی گئی تھی، تاہم شہریوں کی سہولت اور بڑھتے رجسٹریشن عمل کو دیکھتے ہوئے اس میں مزید توسیع کی گئی ہے۔
وزیر ایکسائز کے مطابق 30 جون کے بعد صرف جدید سیکیورٹی فیچرز سے لیس نئی “اجرک” ڈیزائن نمبر پلیٹس ہی قابل قبول ہوں گی، جبکہ پرانی نمبر پلیٹس والی گاڑیوں کے خلاف سخت کارروائی عمل میں لائی جائے گی، جن میں گاڑیوں کی ضبطی اور جرمانے شامل ہیں۔
مزید پڑھیں؛ گاڑیوں کی نمبر پلیٹس رجسٹریشن میں 31 مئی تک توسیع کا امکان
انہوں نے بتایا کہ دسمبر 2024 تک صوبے میں مختلف اقسام کی رجسٹرڈ گاڑیوں کی تعداد 86 لاکھ سے تجاوز کر چکی ہے، جن میں 45 لاکھ موٹر سائیکلیں، 40 لاکھ دیگر گاڑیاں اور ایک لاکھ رکشے شامل ہیں۔
مکیش کمار کے مطابق نمبر پلیٹ کی تبدیلی اور رجسٹریشن کا عمل تیزی سے جاری ہے، جو پہلے روزانہ 3 سے 4 ہزار گاڑیاں تھا، وہ اب بڑھ کر 22 ہزار سے زائد ہو چکا ہے۔
اس وقت 80 ہزار سے زائد نئی نمبر پلیٹس تیار پڑی ہیں، اور حکومت کی کوشش ہے کہ 30 جون تک یہ عمل مکمل کر لیا جائے، جس کے بعد قوانین کو مزید سخت کر دیا جائے گا۔
