مزدوروں کے عالمی دن پر صدر مملکت اور وزیراعظم کے خصوصی پیغامات، گوگل کا ڈوڈل بھی تبدیل

پاکستان سمیت دنیا بھر میں آج یکم مئی بروز جمعرات محنت کشوں سے اظہارِ یکجہتی کے لیے مزدوروں کا عالمی دن منایا جا رہا ہے، اس موقع پر صدر مملکت آصف علی زرداری اور وزیراعظم محمد شہباز شریف نے اپنے خصوصی پیغام جاری کردیے ہیں اور گوگل نے خصوصی ڈوڈل پیش کردیا ہے۔

صدر مملکت آصف علی زرداری

صدر مملکت آصف علی زرداری اور وزیراعظم محمد شہباز شریف نے یوم مزدور کی مناسبت سے محنت کش طبقے کیلئے اپنے پیغامات جاری کردیے۔ صدر آصف زرداری نے محنت کشوں کے عالمی دن پر پیغام دیتے ہوئے کہا کہ آج کا دن اس جدوجہد کی یاد دلاتا ہے جو محنت کشوں نے اپنے حقوق کے لیے کی، قومی ترقی مزدوروں کی محنت اور کردار کی مرہون منت ہے۔

انہوں نے مزید کہا کہ مزدوراور محنت کش طبقہ ہماری معیشت، قومی ترقی کا اہم کردار ہے، مزدور ہمارے بنیادی ڈھانچے کی تعمیر کرتے ہیں، مزدور صنعتوں، زراعت، معیشت کی ترقی میں بھی اہم کردار ادا کرتے ہیں۔

وزیراعظم شہبازشریف

دوسری جانب وزیراعظم شہبازشریف نے بھی محنت کشوں کے عالمی دن پر پیغام دیتے ہوئے کہا کہ دوران روزگار محفوظ، صحت مند، باوقار حالات کو فروغ دینے کے لیے پرعزم ہے۔ انہوں نے کہا کہ مزدوروں، افرادی قوت کے تحفظ کے لیے اہم قانون سازی، اصلاحات کی ہیں، مزدوروں کے بنیادی حقوق کا تحفظ آئین پاکستان میں درج ہے۔

وزیراعظم نے مزید کہا کہ محنت کش افرادی قوت قوم کی ترقی کے پیچھے اصل محرک ہے، پاکستان نے کلیدی بین الاقوامی لیبرکنونشنز کی توثیق کی ہے، ایسے مستقبل کی تعمیر کررہے ہیں جہاں ہر مزدور کو محفوظ روزگار تک رسائی ہو۔

گوگل کا خصوصی ڈوڈل

اس دن کی مناسبت سے دنیا کے سب سے بڑے سرچ انجن گوگل نے بھی مزدوروں کو خراجِ تحسین پیش کرنے کیلئے نیا ڈوڈل جاری کر دیا ہے۔ گوگل کے اس ڈوڈل میں محنت کشوں کو مختلف فرائض سرانجام دیتے ہوئے دکھایا گیا ہے۔

مزدوروں کا یہ دن ہر سال یکم مئی کو منایا جاتا ہے تاکہ معاشرے میں مزدوروں کی کامیابیوں اور شراکت کو یاد رکھا جا سکے۔

مزدوروں کا عالمی دن، آغاز کیسے ہوا؟

1886 کو یکم مئی کے دن امریکا کے شہر شکاگو کے ہزاروں مزدور، سرمایہ داروں اور صنعت کاروں کی جانب سے کئے جانے والے استحصال کیخلاف سڑکوں پر نکلے تو پولیس نے جلوس پر فائرنگ کر کے سیکڑوں مزدوروں کو ہلاک اور زخمی کردیا جبکہ درجنوں مزدور رہنماؤں کو اپنے حق کے لئے آواز بلند کرنے پر پھانسی دی گئی۔

شکاگو کے محنت کشوں کے ساتھ اظہار یکجہتی کیلئے دنیا کے بیشتر ممالک میں یکم مئی کو مزدوروں کا عالمی دن منایا جاتا ہے، یکم مئی کو ہر سال یہ دن اس عہد کے ساتھ منایا جاتا ہے کہ مزدوروں کے معاشی حالات تبدیل کرنے کے لئے کوششیں تیز کی جائیں۔