سعودی عرب سے کراچی پہنچنے والے مسافروں میں کرونا کی تصدیق

سعودی عرب کے شہر جدہ سے شہر قائد پہنچنے والے مزید 14 مسافروں میں کورونا وائرس کی تشخیص ہوئی ہے۔ وبا سے متاثرہ افراد کو قرنطینہ منتقل کردیا گیا۔

محمکہ صحت سندھ کے مطابق سعودی ایئرلائن کی پرواز ایس وی 700 کے ذریعے کراچی پہنچنے والے تمام مسافروں کے ریپڈ ٹیسٹ کئے گئے جس کے نتیجے میں 14 مسافروں میں کورونا وائرس کی تصدیق ہوئی۔

آے ار وائے کے مطابق دو روزقبل بھی سعودی دارالحکومت ریاض سے کراچی پہنچنے والے 8 مسافروں میں کورونا کی تصدیق ہوئی تھی۔ اسی طرح 12 ستمبر کو بھی سعودی شہر جدہ سے کراچی پہنچنے والے 9 مسافر کورونا میں مبتلا نکلے تھے۔

خیال رہے کہ سعودی عرب سمیت دیگر خلیجی ریاستوں سے وطن لوٹنے والے مسافروں کے ریپڈ ٹیسٹ کیے جاتے ہیں۔