-
-
اسٹیٹ بینک آف پاکستان نے بینکوں کے نئے اوقات کار جاری کردئے۔ اسٹیٹ بینک اور کمرشل و مائیکرو فنانس بینکوں میں ہفتہ کی چھٹی بحال کردی گئی ہے۔
اسٹیٹ بینک آف پاکستان کے جاری کردہ اعلامئے کے مطابق اسٹیٹ بینک کے دفاتر پیر تا جمعرات صبح 9 بجے سے شام 5:30 تک خدمات فراہم کریں گے۔دوپہر1:30 سے 2:15 تک کھانے اور نماز کا وقفہ ہوگا۔
جمعہ کو اسٹیٹ بینک کے دفاتر صبح 9 سے شام 6 تک کھلے رہیں گے، ایک بجے تا ڈھائی بجے تک جمعہ کی نماز اور کھانے کا وقفہ ہوگا۔ اسٹیٹ بینک کے دفاتر ہفتہ اور اتوار کے روز بند رہیں گے۔
بینک اور مالیاتی ادارے اپنے کاروباری تقاضوں اور اسٹیٹ بینک کے فیلڈ دفاتر کے اوقات کو مدنظر رکھتے ہوئے اپنے کاروباری اوقات مقرر کرسکتے ہیں۔
عوام اور کاروباری طبقہ کو خدمات کی فراہمی کے لیے کمرشل اور مائیکروفنانس بینکس کاروباری مراکز، کمرشل سینٹر اور بڑے شہروں میں ہفتہ کو اپنی مخصوص شاخیں کھول سکتے ہیں۔ بندرگاہ اور کسٹم ہاؤس میں بینکوں کے بوتھ معمول کے مطابق 24 گھنٹے خدمات فراہم کریں گے۔
کمرشل اور مائیکروفنانس بینک ہفتہ کو کھلنے والی برانچوں کی فہرست اسٹیٹ بینک کو فراہم کرنے کے ساتھ عوام الناس کے لیے ویب سائٹ پر بھی جاری کریں گے۔
ہفتہ کو کھلنے والی بینکوں کی شاخوں پر نمایاں طور پر لکھنا ہوگا کہ یہ برانچ ہفتہ کو کھلی رہے گی، نئے اوقات کار پر فی الفور عمل درآمد ہوگا۔
