-
-
بین الاقوامی اولمپک کمیٹی (آئی او سی) نے 2028 کے اولمپکس میں کرکٹ کی واپسی کا اعلان کردیا ہے۔
جاری کردہ پریس ریلیز میں بتایا گیا کہ کرکٹ کی طویل عرصے بعد واپسی کا اعلان باضابطہ مقابلے کے شیڈول کے ساتھ کیا گیا، پریس ریلیز میں کہا گیا ہے کہ کرکٹ میچز 12 جولائی 2028 سے شروع ہوں گے، جبکہ 20 اور 29 جولائی کو میڈل میچز کھیلے جائیں گے۔
مزید کہا گیا کہ لاس اینجلز میں 2028 میں 14 اور 21 جولائی کو کوئی میچ نہیں ہوگا، زیادہ تر دنوں میں ایک دن میں 2 میچ ہوں گے، جو مقامی وقت کے مطابق صبح 9 بجے اور شام 6:30 بجے شروع ہوں گے، میڈل میچز کے لیے بھی یہی اوقات ہوں گے۔
مردوں اور خواتین کے ہر ٹورنامنٹ میں 6، 6 ٹیمیں حصہ لیں گی اور ہر ٹیم کے لیے 15 کھلاڑیوں پر مشتمل اسکواڈ مقرر کیا گیا، جس کے لیے مرد و خواتین کے لیے 90، 90 کوٹے رکھے گئے ہیں۔ پریس ریلیز میں مزید کہا گیا کہ تمام میچز لاس اینجلس سے تقریباً 50 کلومیٹر دور پومونا میں فیئر گراؤنڈز پر خصوصی طور پر بنائے گئے عارضی اسٹیڈیم میں ہوں گے۔
مزید پڑھیں:سندھ اولمپکس ایسوسی ایشن نے کراچی میں شیڈول نیشنل گیمز ایک بار پھر ملتوی کر دیے
میڈیا رپورٹ کے مطابق پاکستان کی مردوں اور خواتین ٹیموں کی شرکت مشکوک ہے کیوں کہ رینکنگ کی بنیاد پر پاکستان کا کوالی فائی کرنا مشکل ہے۔
سی ڈبلیو آئی کے چیف ایگزیکٹو کرس ڈیرنگ نے کہا تھا کہ’ہم صرف یہ چاہتے ہیں کہ ہمارے انفرادی ممالک کی شاندار اولمپک تاریخ کو اس گفتگو میں شامل کیا جائے، ہمارے ممالک نے ہمیشہ انفرادی جھنڈے کے ساتھ اولمپکس میں سونے کے تمغے جیتے ہیں۔
انہوں نے کہا کہ اب جب کہ کرکٹ شامل ہو چکی ہے تو ہمیں اس بات کو یقینی بنانا ہوگا کہ ہمارے کرکٹرز تاریخ سے باہر نہ ہوں، ہم تعاون کرنے کو تیار ہیں، ہم مقابلہ کرنے کو تیار ہیں لیکن سب سے بڑھ کر ہم صرف انصاف مانگ رہے ہیں۔
واضح رہے کہ اس سے قبل کرکٹ کو آخری مرتبہ پیرس اولمپکس 1900 میں شامل کیا گیا تھا، جس میں برطانیہ اور میزبان فرانس کی ٹیموں نے حصہ لیا تھا جہاں برطانیہ نے کامیابی سمیٹی تھی، اکتوبر 2023 میں اعلان کیا گیا تھا کہ لاس اینجلس گیمز 2028 کے اعلیٰ عہدیداروں نے مردوں اور خواتین کی ٹی20 کرکٹ کی 6 ٹیموں کا ٹورنامنٹ کرانے کی تجویز دی ہے، جس میں میزبان کے طور پر امریکا بھی اپنی ٹیم شامل کرے گا۔
