کراچی کے ہزاروں مقامات پر نماز تراویح کا اہتمام

رمضان المبارک کی آمد کے ساتھ ہی کراچی کی ہزاروں مساجد اور دیگر مقامات پر ہزاروں حفاظ کرام یکم رمضاں سے 29 رمضان تک قرآن کریم سنائیں گے، شہر کے ہزاروں مقامات پر سہہ روزہ سے 29 روزہ تک کے چھوٹے بڑے تراویح کے اجتماعات ہونگے۔

اعدادوشمار کے مطابق تقریباً 4 ہزار مساجد کے علاوہ پارکس، کھیل کے میدانوں، شادی لان، کمیونٹی سینٹرز و دیگر کھلے و چاردیواری کے مقامات، بازاروں، تجارتی مراکز کے قریب شاہراہوں پرنماز تراویح کا انتظام کیا گیا ہے۔

رمضان المبارک کے آغاز پر کراچی کی چھوٹی اور بڑی ہزاروں مساجد میں نماز تراویح کیلئے خصوصی انتظامات کیے گئے ہیں۔ بعض مساجد اور مقامات پر خواتین کے لیے بھی نماز تراویح کی ادائیگی کے انتظامات ہیں۔ بعض شادی لانز اورکمیونٹی سینٹرز میں بھی تراویح کے انتظامات کیے گئے ہیں۔ کراچی میں 100 سے زائد مقامات پر روزانہ تراویح کے ساتھ قرآن کریم کے مختصر ترجمے اور خلاصے کا اہتمام ہے۔

کراچی میں کن مساجد میں تراویح کا اہتمام کیا گیا ہے؟

ایک اندازے کے مطابق کراچی میں 50 ہزار سے زائد حفاظ کرام قرآن کریم سنانے کی سعادت حاصل کریں گے۔ کراچی میں نماز تراویح کے بڑے اجتماعات نیومیمن مسجد عمر بن عبدالعزیز ڈی ایچ اے، مسجد بولٹن مارکیٹ، جامع مسجد آرام باغ، جناح مسجد برنس روڈ، گلزار حبیب سولجر بازار، بیت السلام مسجد گذری، جامعہ دارالعلوم کراچی، جامعۃ الرشید احسن آباد، فیضان مدینہ سبزی منڈی، تھانوی مسجد جیکب لائن، جامعہ علوم الاسلامیہ علامہ بنوری ٹائون، جامعہ بنوریہ سائٹ ایریا، میمن مسجد مصلح الدین گارڈن، جامع مسجد امجدیہ عالمگیر روڈ، عالمگیر مسجد بہادر آباد، خالقدینا ہال، رحمانیہ مسجد طارق روڈ، مسجد بیت المکرم گلشن اقبال، جامعہ اسلامیہ کلفٹن ،مسجد ابو بکر کلفٹن، سبیل والی مسجد، سلطان مسجد ڈیفنس، مدنی مسجد عزیزآباد، فاروق اعظم مسجد نارتھ ناظم آباد، طوبیٰ مسجد ڈیفنس، جامع مسجد کنزالایمان گرومندر، جامع مسجد طیبیہ، سفید مسجد اللہ والا ٹاؤن، جامع مسجد طیبہ پی ای سی ایچ ایس اور دیگر مقامات پر ہوں گے۔

نماز تراویح کے اہتمام کے لیے مساجد اوردیگرمقامات پر خصوصی انتظامات کیے گئے ہیں، جن میں شرکا کیلیے مناسب صفوں، وضو اور بیت الخلا کے انتظامات کیے گئے ہیں، جبکہ پینے کے پانی اور روشنی کا انتظام بھی شامل ہے۔ تجارتی اور کاروباری سرگرمیوں میں حصہ لینے والے افراد کی جانب سے کراچی میں بڑی تعداد میں سہ روزہ، پانچ روزہ ،چھ روزہ اور دس روزہ تراویح کے انتظامات بھی کیے گئے ہیں۔

اعدادوشمار کے مطابق کراچی میں 4 ہزار سے زائد مساجد، 500 شادی اور کیمونٹی ہالز اور 100 سے زائد دیگر بڑے مقامات پر نماز تراویح کا اہتمام کیا گیا ہے۔