سندھ حکومت اور گوگل کے درمیان معاہدہ، گوگل اسکالرشپ کیلیے کون کون درخواست دے سکتا ہے؟

سندھ حکومت اور گوگل کے درمیان آئی ٹی ٹریننگ اور ڈیجیٹل صحافت پروگرام کے لیے اسکالرشپ معاہدے ہوگئے۔

تفصیلات کے مطابق وزیراعلیٰ سندھ مراد علی شاہ کی زیر صدارت ایم او یوز پر دستخط کی تقریب منعقد ہوئی، جس میں پیپلز آئی ٹی پروگرام اور گوگل ڈیجیٹل صحافت اسکالرشپ کے معاہدوں پر دستخط کیے گئے۔

تقریب سے خطاب کرتے ہوئے وزیراعلیٰ سندھ نے کہا کہ ہزاروں طلبہ عالمی معیار کی آئی ٹی مہارتیں حاصل کرچکے ہیں اور اب تک 4 ہزار 300 سے زائد فارغ التحصیل نوجوان مختلف معاشی سرگرمیوں میں فعال کردار ادا کر رہے ہیں، پروگرام میں خواتین کی شمولیت اور دیہی نمائندگی اس کی بڑی کامیابی ہے۔

مراد علی شاہ نے بتایا کہ پی آئی ٹی پی ٹو کے لیے 1400 ملین روپے مختص کیے گئے ہیں جس کے تحت 35 ہزار طلبہ کو 12 جدید ٹیکنالوجیز پر تربیت فراہم کی جائے گی۔ ان کا کہناتھا کہ این ای ڈی یونیورسٹی، مہران یونیورسٹی اور سکھر آئی بی اے اس پروگرام کے تحت تربیت فراہم کریں گے، جبکہ میٹرک سے گریجویشن تک کے طلبہ درخواست دے سکیں گے۔

مزید پڑھیں:پاکستانی طلباء کیلیے عمان میں مکمل فنڈڈ اسکالرشپ کا اعلان

ڈیجیٹل صحافت پروگرام کے حوالے سے وزیراعلیٰ نے کہا کہ یہ منصوبہ سندھ حکومت اور ٹیک ویلی کا مشترکہ پراجیکٹ ہے جس کے دوسرے مرحلے ڈیجیٹل جرنلزم 2.0 کے تحت ایک ہزار اسکالرشپس دی جائیں گی، یہ اسکالرشپس صحافیوں، سرکاری ترجمانوں اور میڈیا اسٹڈیز کے طلبہ کو فراہم کی جائیں گی۔

ان کا مزید کہنا تھا کہ معتبر صحافت اور شفافیت کے فروغ کے لیے یہ پروگرام سنگ میل ثابت ہوگا۔ وزیر اطلاعات سندھ شرجیل میمن نے تقریب میں کہا کہ گوگل ڈیجیٹل صحافت پروگرام سے فیک نیوز کے پھیلاؤ میں نمایاں کمی آئے گی۔