-
-
کراچی میں آئندہ تین روز کے دوران موسم زیادہ تر ابر آلود رہنے کی پیشگوئی کی گئی ہے۔ محکمہ موسمیات کی جانب سے کہا گیا ہے کہ 24 گھنٹے کے دوران موسم گرم اور مرطوب رہے گا ساتھ ہی شام اور رات میں بوندا باندی متوقع ہے۔
محکمہ موسمیات کا کہنا ہے کہ سمندری ہوائیں بحال ہونے سے موسم بہتر ہے جبکہ ہوا میں نمی زیادہ ہونے سے دن میں گرمی کی شدت محسوس کی جائے گی، کراچی میں آج زیادہ سے زیادہ درجہ حرارت 34 ڈگری تک پہنچ سکتا ہے جبکہ شہر میں رواں ہفتے تیز بارش کا کوئی امکان نہیں ہے۔
دوسری جانب محکمہ موسمیات کا کہنا ہے کہ اسلام آباد اور گردونواح میں آج مطلع ابر آلود رہے گا جبکہ تیز ہواؤں اور گرج چمک کے ساتھ بارش کا امکان ہے۔ محکمہ موسمیات کے مطابق زیادہ سے زیادہ فرجہ حرارت 33 ڈگری سینٹی گریڈ تک جانے کا امکان ہے، اسلام آباد اور راولپنڈی میں تیز اور موسلادھار بارش سے نشیبی علاقے زیر آب آنے کا خدشہ ہے۔
پنجاب کے مختلف اضلاع میں گرج چمک کے ساتھ بارش، کہیں کہیں موسلادھار بارش متوقع ہے، لاہور، گجرانوالہ، گجرات، سیالکوٹ اور نارووال میں نشیبی علاقے زیر آب آنے کا خدشہ ہے، مری اور گلیات سمیت شمال مشرقی پنجاب میں لینڈ سلائیڈنگ سے ٹریفک متاثر ہونے کا امکان ہے۔
مزید پڑھیں:کراچی میں حالیہ بارشوں سے کتنا نقصان ہوا؟
خیبرپختونخوا کے بیشتر اضلاع میں بارش، دیر، سوات اور مانسہرہ میں موسلادھار بارش کی توقع ہے، پشاور، نوشہرہ اور مردان کے نشیبی علاقوں میں بارش کے باعث پانی جمع ہونے کا خدشہ ہے۔
سندھ کے سانگھڑ، گھوٹکی، تھرپارکر اور عمرکوٹ میںں رات کو بارش کا امکان ہے، بلوچستان کے ژوب، موسیٰ خیل اور بارکھان میں گرج چمک کے ساتھ بارش متوقع ہے اس کے علاوہ کشمیر میں تیز ہواؤں اور گرج چمک کے ساتھ بارش، چند مقامات پر موسلادھار بارش کا بھی امکان ہے۔
