ٹرمپ انتظامیہ کا کئی کیٹیگریز میں ویزا کی مدت محدود کرنے کا فیصلہ

ٹرمپ انتظامیہ نے کئی کیٹیگریز میں ویزا کی مدت محدود کرنے کا فیصلہ کرلیا ہے، غیرملکی طلبہ اور صحافیوں کے ویزا کی مدت محدود کرنے کی تجویز پیش کی گئی ہے۔

ویزا کے غلط استعمال اور غیرملکیوں کی جانچ پڑتال کے نام پر ٹرمپ انتظامیہ نے اہم اقدام اٹھائے ہیں۔ محکمہ ہوم لینڈ سیکیورٹی کا کہنا ہے کہ 1978 سے ایف ویزا کے حامل غیرملکی طلبہ کو لامحدود مدت تک قیام کی اجازت تھی، طلبہ ودیگر کو لامحدود مدت کے قیام کی اجازت سے امریکی شہریوں کو نقصان ہوا ہے۔

مزید پڑھیں:امریکی ویزا، ایف ، ایم یا جے کیٹیگری کے لئے سوشل میڈیا پبلک کرنے کی شرط

محکمہ ہوم لینڈ سیکیورٹی کے مطابق قانون منظور ہوا تو غیرملکی طلبہ کا قیام اسٹڈی پروگرام کی مدت تک محدود ہوگا، غیرملکی طلبہ چار سال سے زیادہ امریکا میں نہیں رہ سکیں گے۔ اسی طرح قانون منظور ہوا تو غیرملکی میڈیا کے نمائندے ابتدائی طور پر 240 روز قیام کرسکیں گے، غیرملکی میڈیا نمائندوں کا قیام 240 روز یا اسائنمنٹ تک بڑھایا جاسکے گا۔

قانون کے مطابق غیرملکی طلبہ اور میڈیا نمائندگان کو ریگولر جانچ پڑتال سے گزرنا ہوگا۔ واضح رہے کہ صدر ٹرمپ نے 2020 میں بھی یہ ویزا قانون تجویز کیا تھا لیکن بائیڈن انتظامیہ نے ٹرمپ دور کا تجویز کردہ ویزا قانون رد کردیا تھا۔