-
-
ملک بھر میں آج 79واں یوم آزادی ملی جوش و جذبے کے ساتھ منایا جا رہا ہے، قوم آج یوم آزادی اس عہد کی تجدید کے ساتھ منا رہی ہے کہ ملک کو ایک حقیقی اسلامی فلاحی ریاست بنانے کے لیے تحریک پاکستان کے جذبے سے کام کیا جائے گا۔
رواں سال یوم آزادی کو معرکہ حق کی عظیم فتح سے منسوب کیا گیا ہے۔ پاکستان میں رات 12 بجتے ہی ملک کے چھوٹے، بڑے شہروں میں یوم آزادی کا بھرپور طریقے سے استقبال کیا گیا۔
شہری سڑکوں پر اُمڈ آئے، فضا ’پاکستان زندہ باد‘ کے نعروں سے گونج اٹھی، چھوٹی بڑی ریلیوں اور مختلف ثقافتی شوز کا انعقاد کیا گیا، شہریوں نے ملی نغموں اور ڈھول کی تھاپ پر بھنگڑے ڈالے۔
79 ویں یوم آزادی پر دن کا آغاز مساجد میں ملکی سلامتی، یکجہتی اور خوشحالی کے لیے خصوصی دعاؤں سے کیا گیا، وفاقی دارالحکومت میں 31 اور صوبائی ہیڈکوارٹرز میں 21، 21 توپوں کی سلامی دی گئی۔ پرچم کشائی کی مرکزی تقریب اسلام آباد میں پاکستان مونومنٹ میں منعقد ہوئی، جس میں وزیراعظم شہباز شریف اور وفاقی وزرا شریک ہوئے۔
پرچم کشائی کی تقریب میں اسکولوں کے بچوں کی بڑی تعداد بھی موجود تھی، علاقائی لباس میں ملبوس بچوں نے وزیراعظم کو پاکستان مونومنٹ آمد پر پھول پیش کیے۔ وزیر اعظم شہباز شریف نے پرچم کشائی کی، یادگار پاکستان پر پھول رکھے اور ملک کی سلامتی، ترقی اور خوشحالی کے لیے خصوصی دعا کی۔
پرچم کشائی کی تقریب کے موقع پر ملی جوش و جذبے سے قومی ترانہ پڑھا گیا۔ بھارت کی بلااشتعال جارحیت کے خلاف معرکہ حق میں حالیہ فتح نے اس سال یوم آزادی کی تقریبات کے لیے قوم کے جوش و خروش کو بڑھا دیا ہے۔ عمارتوں کو قومی پرچموں، جھنڈیوں اور روشنیوں سے سجایا گیا ہے۔ لوگوں نے اپنی گاڑیوں اور گھروں کی چھتوں پر قومی پرچم لہرا رکھے ہیں۔
Today, with gratitude to Almighty Allah, I extend my heartfelt felicitations to the nation on completion of 78 years of independence of Pakistan.
I pay tribute to Father of the Nation, Quaid-i-Azam Muhammad Ali Jinnah, and the Thinker of Pakistan, Allama Muhammad Iqbal, who… pic.twitter.com/bnXJDsEvnI
— Prime Minister’s Office (@PakPMO) August 14, 2025
مزید پڑھیں:یوم آزادی کے موقع پر شکرپڑیاں پریڈ گراؤنڈ میں رنگا رنگ تقریبات کی تیاریاں
مزار قائد و اقبال پر گارڈز کی تبدیلی کی پروقار تقاریب
یوم آزادی پر بانی پاکستان قائداعظم محمدعلی جناح کے مزار پر گارڈز کی تبدیلی کی پروقارتقریب منعقد کی گئی، تقریب میں کمانڈنٹ پاکستان نیول اکیڈمی کموڈور تصور اقبال نے بطور مہمان خصوصی شرکت کی۔
اس موقع پر پاکستان نیول اکیڈمی کے چاق و چوبند کیڈٹس اور پاک بحریہ کے جوانوں نے مزار پر اعزازی گارڈ کے فرائض سنبھالے، کمانڈنٹ پاکستان نیول اکیڈمی کموڈور تصور اقبال کی مزار قائد پر حاضری دی، گلدستہ رکھا اور فاتحہ خوانی کی۔
واضح رہے کہ ہرسال 14اگست پر پاکستان نیول اکیڈمی کے کیڈٹس مزار قائد پر اعزازی گارڈ کے فرائض سنبھالتے ہیں، اعزازی گارڈز دو دستوں پر مشتمل ہے، ایک دستہ پاک بحریہ کےسیلرز، دوسرا پاکستان نیول اکیڈمی کے کیڈٹس پر مشتمل ہے۔
دریں اثنا، لاہور میں شاعر مشرق علامہ محمد اقبال کے مزار پر بھی گارڈز کی تبدیلی کی پروقار تقریب منعقد کی گئی، اس موقع پر رینجرز کی جگہ پاک فوج کے چاک و چوبند دستے نے اعزازی گارڈ کے فرائض سنبھالے، پاک رینجرز اور فوج کے چاق و چوبند دستے نے مزار اقبال پر سلامی دی۔
گورنر، وزیر اعلیٰ سندھ اورکور کمانڈر کراچی کی مزار قائد پر حاضری
گورنر سندھ کامران ٹیسوری اور وزیراعلیٰ سندھ مراد علی شاہ نے صوبائی کابینہ کے ارکان کے ہمراہ مزار قائد پر حاضری دی، فاتحہ خوانی کی اور مہمانوں کی کتاب میں تاثرات درج کیے، اس موقع پر گورنر اور وزیراعلیٰ نے پرچم کشائی بھی کی۔
اس موقع پر گورنر سندھ کامران ٹیسوری نے میڈیا سے گفتگو میں کہا کہ بھارت نے رات کی تاریکی میں شب خون مارنے کی کوشش کی، افواج پاکستان نے بھارت کوایساجواب دیا کہ اس کی مثال نہیں ملتی، افواج پاکستان نےقوم کاسرفخرسے بلند کردیا۔
کراچی: وزیراعلیٰ سندھ سید مراد علی شاہ کی مزار قائد پر حاضری
صوبائی وزراء شرجیل انعام میمن، سید ناصر حسین شاہ، سید ذوالفقار علی شاہ، سعید غنی، جام خان شورو، ضیاء الحسن لنجار، محمد علی ملکانی و دیگر صوبائی وزراء اورمشیر ان بھی موجود، pic.twitter.com/WV6ESDwttb
— Sindh Information Department (@sindhinfodepart) August 14, 2025
انہوں نے کہا کہ خطے میں پاکستان کی اہمیت سے پوری طرح آگاہ ہیں، ملک کا دفاع مضبوط ہاتھوں میں ہے، فیلڈ مارشل کی تعریف سپرپاور امریکا کے صدر نے بھی کی، بھارت کےخلاف جنگ دفاعی،سفارتی اورصحافتی میدانوں میں جیتی۔
کور کمانڈر کراچی لیفٹیننٹ جنرل محمد اویس دستگیر نے بھی مزار قائد پر حاضری دی، فاتحہ خوانی کی، پھول رکھے اور مہمانوں کی کتاب میں تاثرات درج کیے۔
دریں اثنا، قائم مقام گورنر ملک محمد احمد خان نے مزار اقبال پر حاضری دی، فاتحہ خوانی کی اور پھولوں کی چادر چڑھائی، اس موقع پر قائم مقام گورنر ملک محمد احمد خاں کو پاک آرمی کے چاق و چوبند دستے نے سلامی پیش کی۔
