-
-
بھارتی میڈیا نے گزشتہ روز دعویٰ کیا تھا کہ پاکستان ہاکی ٹیم نے بھارت میں ایشیا کپ کھیلنے سے انکار کر دیا ہے جس پر پی ایچ ایف کا موقف آگیا ہے۔
پاکستان ہاکی فیڈریشن (پی ایچ ایف) نے بھارتی میڈیا پر ایشیا کپ میں پاکستان ہاکی ٹیم کے شرکت سے انکار سے متعلق چلنے والی تمام خبروں کو مسترد کر دیا ہے۔ سیکریٹری پی ایچ ایف رانا مجاہد کا اس حوالے سے کہنا ہے کہ تاحال ایونٹ میں شرکت سے منع نہیں کیا ہے۔ ایشیا کپ کھیلنے کے لیے قومی ہاکی ٹیم کے بھارت جانے یا نہ جانے کا فیصلہ حکومت کرے گی۔
انہوں نے کہا کہ نہ ہم نے ایشیا کپ کھیلنے سے انکار کیا اور نہ ہی انڈین ہاکی فیڈریشن سے کوئی بات ہوئی ہے۔ تاہم ایشین ہاکی فیڈریشن سے رابطے میں ہیں۔ سیکیورٹی اور ویزے کی ضمانت دی جائے۔
دوسری جانب میڈیا رپورٹ کے مطابق بنگلادیش ہاکی فیڈریشن کا کہنا ہے کہ انہیں بھارت میں ہونے والے ایشیا کپ میں شرکت کا کوئی باضابطہ دعوت نامہ نہیں ملا۔ بنگلہ دیش اسٹینڈ بائی ضرورہے، لیکن اتنی جلد ٹیم بنانا اور تیاری کرنا آسان نہیں۔
واضح رہے کہ گزشتہ روز بھارتی میڈیا نے دعویٰ کیا تھا کہ پاکستان ہاکی ٹیم نے بھارت میں ہونے والے ایشیا کپ کھیلنے سے انکار کر دیا ہے جس کے بعد بنگلہ دیش کو اس کی جگہ ایونٹ میں شامل کیا گیا ہے۔ بھارتی میڈیا نےدعوٰی کیا تھا پاکستان کےانکار کےبعد بنگلادیش کو متبادل کےطور پر ایونٹ کاحصہ بنایا گیا ہے۔
