-
-
پاکستان میں حالیہ مون سون سیزن کے دوران کلاوڈ برسٹ اور سیلابی صورتحال نے زبرست تباہی مچائی ہے ۔دریاؤں اور ندی نالوں میں طغیانی کے باعث ایسے واقعات پیش آئےجن میں گاڑیاں پانی کے بہاؤ کی زد میں آگئیں اور کئی قیمتی جانوں کا نقصان ہوا ۔ ان حالات میں فوری ردعمل اور ہوش مندی سے کیا جانے والا عمل آپ کی جان بچا سکتا ہے۔
نیشنل ہائی ویز اینڈ موٹر وے پولیس کے جانب سے جاری احتیاطی تدابیر کے مطابق ان حالات میں لوگوں کی جانب سے عام طور پر جو غلطی کی جاتی ہے وہ دروازہ کھولنے کی کوشش ہوتی ہے لیکن اگر آپ کسی ایسے حادثے کا شکار ہوں جس میں آپ کی گاڑی ڈوب رہی ہو تو کبھی بھی دروازہ کھول کر باہر نکلنے کی غلطی نہ کریں ۔
مزید پڑھیں:پاکستان میں گاڑیوں کے لیےپہلا حفاظتی قانون منظور
گاڑی کے باہر پانی کا دباؤ بہت شدید ہوتا ہے جس سے دروازہ کھولنا تقریباً ناممکن ہو جاتا ہے، اگر دروازہ کھل بھی جائے تو باہر سے زیادہ پانی اندر آئے گا جس سے گاڑی تیزی سے ڈوبنے لگے گی۔
اس کے بجائے گاڑی میں موجود شخص کو چاہیے کہ فوراً ہی اپنی طرف کا شیشہ نیچے کرے اور گاڑی سے باہر نکلے، اگر شیشہ نیچے نہ ہورہا ہو تو سیٹ کی پشت پر لگا ہیڈ ریسٹ نکالے اور اس کی دھاتی نوک استعمال کرتے ہوئے گاڑی کا پچھلا شیشہ توڑ کر باہر نکلے۔
گاڑی کا اگلا حصہ انجن کے باعث زیادہ وزنی ہوتا ہے اور اسی لیے پہلے ڈوبتا ہے جبکہ پچھلا حصہ قدرے زیادہ دیر تک پانی کی سطح پر تیرتا رہتا ہے۔ یہی وہ وقت ہوتا ہے جب آپ کو فوری طور پر گاڑی سے باہر نکلنا ہوتا ہے۔ اور صرف چند لمحے میں کیا گیا درست فیصلہ آپ کی جان بچا سکتا ہے۔
