-
-
حکومت سندھ کی جانب سے کے الیکٹرک کو ریڈ لائن بی آر ٹی کی راہ میں حائل یوٹیلیٹیز ہٹانے اور واٹر بورڈ کو جلد از جلد کے فور پائپ لائن کا کام مکمل کرنے کے احکامات دیے گئے ہیں۔
تفصیلات کے مطابق سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن کی زیر صدارت ریڈ لائن بی آر ٹی منصوبے پر اہم اجلاس ہوا، اجلاس میں سیکریٹری ٹرانسپورٹ اسد ضامن، سی ای او ٹرانس کراچی فواد غفار سومرو، انجینئرز، کنسلٹنٹس اور کے الیکٹرک کے نمائندگان نے شرکت کی۔
اجلاس میں حکام نے بی آر ٹی منصوبے میں پیش رفت کے حوالے سے تفصیلی بریفنگ دی، اجلاس میں منصوبے میں حائل رکاوٹوں کے خاتمے کے لئے اقدامات اور کنٹریکٹرز کو درپیش مسائل کا جائزہ لیا گیا۔ شرجیل انعام میمن نے متعلقہ محکموں کو ہدایت دی کہ مسائل کو فوری طور پر حل کیا جائے تاکہ منصوبے پر کام کی رفتار متاثر نہ ہو۔
مزید پڑھیں:حکومت سندھ کا مزید بسوں، ای وی ٹیکسیوں اور اسکوٹرز کے لیے بجٹ مختص کرنے کا فیصلہ
انہوں نے کہا کہ ریڈ لائن بی آر ٹی کے راستے میں آنے والی تمام یوٹیلیٹیز کی منتقلی 15 ستمبر 2025 تک مکمل کی جائیں، بی آر ٹی کوریڈور میں 2 اعشاریہ 7 کلومیٹر پر محیط کے فور منصوبے کی پائیپ لائن جلد مکمل کی جائے۔
وزیرٹرانسپورٹ سندھ نے ہدایت جاری کی کہ واٹر بورڈ جلد از جلد کے فور پائپ لائن کا کام مکمل کرے تاکہ کام کی روانی متاثر نہ ہو۔ انہوں نے کہا کہ ریڈ لائن بی آر ٹی عوام کا ایک اہم منصوبہ ہے مزید تاخیر کے متحمل نہیں ہو سکتے، تمام اسٹیک ہولڈرز آپس میں رابطہ اور تعاون بڑھائیں اور منصوبے پر بلا تعطل کام جاری رکھیں۔
