سندھ حکومت کا مفت سولر سسٹم دینے کا اعلان

سندھ حکومت نے بجلی صارفین کو مفت سولر سسٹم دینے کا اعلان کردیا ہے۔

تفصیلات کے مطابق سندھ حکومت نے ماہانہ 100 یونٹ تک بجلی استعمال کرنے والے گھریلو صارفین کے لیے مفت سولر سسٹم فراہم کرنے کا اعلان کر دیا ہے۔ یہ اقدام سندھ انرجی ڈیپارٹمنٹ کی جانب سے متعارف کرایا گیا ہے۔

سندھ حکومت نے دو لاکھ گھرانوں میں سولر پینلز تقسیم کرنے کا اعلان کیا تھا۔ صوبائی اسمبلی کے اعداد و شمار کے مطابق 77,000 گھرانوں کو پہلے ہی سولر پینل فراہم کیے جا چکے ہیں اور اگلے مرحلے میں مزید 123,000 خاندانوں کو پینل فراہم کیے جائیں گے۔

مزید پڑھیں:حکومت کا بجٹ میں سولرپینل پر عائد ٹیکس کم کرنے کا اعلان

اسکیم کے تحت اہل گھرانے 20 اگست 2025 تک مفت سولر پینلز کے حصول کے لیے درخواست دے سکتے ہیں۔ میڈیا رپورٹ کے مطابق صوبے بھر سے اب تک 1 لاکھ 23 ہزار سے زائد درخواستیں موصول ہو چکی ہیں، اگر درخواست دہندگان کی تعداد دستیاب کوٹے سے تجاوز کر گئی تو مستفید ہونے والوں کا انتخاب شفاف قرعہ اندازی کے ذریعے کیا جائے گا۔

ترجمان محکمہ توانائی کے مطابق یہ پروگرام صوبائی حکومت کی اس وسیع پالیسی کا حصہ ہے جس کا مقصد قومی گرڈ پر انحصار کم کرنا، توانائی کے اخراجات میں کمی لانا اور قابلِ تجدید توانائی کے استعمال کو فروغ دینا ہے۔

دوسری جانب سندھ کے وزیر توانائی سید ناصر حسین شاہ نے کہا کہ صوبائی حکومت عوام کو کم لاگت اور ماحول دوست توانائی فراہم کرنے کے لیے اقدامات کر رہی ہے۔