-
-
وفاقی کابینہ نے حج پالیسی 2026کی منظوری دے دی، سرکاری اسکیم کے تحت حجاج کرام کا کوٹہ ایک لاکھ19ہزار 210 اور اخراجات کا تخمینہ ساڑھے11 سے ساڑھے12 لاکھ روپےکے درمیان ہوگا۔
وفاقی وزیر مذہبی امور سردار محمد یوسف کے مطابق سرکاری حج اسکیم کےتحت 4اگست سے درخواستوں کی وصولی شروع ہوگی اور حج اخراجات دو اقساط میں ادا کیے جاسکیں گے۔
حج درخواست کے لیے پاکستانی پاسپورٹ کا حامل ہونا لازمی ہے 12سال سے کم عمر بچوں کو اس سال حج کی اجازت نہیں ہوگی۔ حج کی ادائیگی کےلیےسعودی عرب سےمنظور شدہ ویکسین لگوانا لازمی ہوگا۔
وفاقی وزیر مذہبی امور نے کہا کہ عازمین کو حج سے متعلق مکمل تربیت دی جائے گی، جس میں لاجسٹک، حج کے طریقہ کار لباس اور دیگر امور شامل ہوں گے۔ ایمرجنسی رسپانس ٹیمیں تشکیل دی جائیں گی اور مالیاتی نگرانی کا موثر نظام لاگو کیا جائے گا۔شکایات کے ازالے کے لیے شفاف نظام بھی رائج کیا جائے گا۔آئندہ برس حج کے لیے پرائیویٹ اسکیم کا کوٹہ کم کیا گیا ہے، تاکہ وہ اسے استعمال کر سکیں اور بہتر سروس فراہم کر سکیں۔ پرفارنس بہتر ہوئی تو کوٹہ بڑھانے پرغور ہو سکے گا۔
