-
-
کراچی میں کے الیکٹرک کی جانب سے بن قاسم کلسٹر دھابیجی سب اسٹیشن اور گرڈ اسٹیشن پر پر مرمتی کام کیا جائے گا جس کے باعث شہر کو پانی کی کمی کا سامنا ہوگا۔
کراچی واٹر کارپوریشن کے مطابق کے الیکٹرک کا بن قاسم کلسٹر دھابیجی سب اسٹیشن اور گرڈ اسٹیشن پر مینٹیننس کا کام 29 جولائی بروز منگل کو کیا جائے گا، مینٹیننس کا کام صبح 10 بجے سے شام 7 بجے تک جاری رہے گا، مینٹیننس کے کام کے باعث شہر کو پانی کی فراہمی میں کمی کا سامنا ہوگا۔
مزید پڑھیں:گھارو پمپنگ اسٹیشن پربجلی کا فالٹ، کراچی کے کون کونسے علاقوں کو پانی کی فراہمی متاثرہوگی؟
ترجمان کا کہنا ہے کہ دھابیجی پمپنگ اسٹیشن کے مختلف فیڈرز پر بجلی کی فراہمی جزوی طور پر معطل رہے گی، کے الیکٹرک کی جانب سے شٹ ڈاؤن کا دورانیہ مجموعی طور پر 9 گھنٹے ہوگا، مینٹیننس کے کام کے باعث شہر کو پانی کی فراہمی میں 85 ملین گیلن کی کمی متوقع ہے۔
کونسے علاقے متاثر ہوں گے؟
واٹر کارپوریشن کے ترجمان کے مطابق کے الیکٹرک کا بن قاسم کلسٹر کے دھابیجی سب اسٹیشن اور گرڈ اسٹیشن پر مرمتی کے باعث لانڈھی، کورنگی، شاہ فیصل، بن قاسم، ڈی ایچ اے اور نارتھ ناظم آباد میں پانی کی فراہمی میں کمی ہوگی۔
کراچی واٹر اینڈ سیوریج کارپوریشن کے مطابق شہر کو یومیہ 650 ملین گیلن پانی فراہم کیا جاتا ہے جس میں سے شہر کو 565 ملین گیلن پانی کی فراہمی معمول کے مطابق جاری رہے گی۔ ترجمان کے مطابق شٹ ڈاؤن کے لیے درخواست کے الیکٹرک کے ڈپٹی جنرل منیجر گرڈ سسٹم آپریشنز کی جانب سے دی گئی تھی۔
