-
-
بلدیہ عظمیٰ کراچی نے شہر کے 10 اہم مقامات پر اسمارٹ پارکنگ زونز کے قیام کی منظوری دیدی ہے۔
تفصیلات کے مطابق بلدیہ عظمیٰ کراچی کی جانب سے شہر کے منتخب کور شدہ پارکنگ زونز میں اسمارٹ ڈیجیٹل پارکنگ سروسز شروع کرنے کا اعلان کیا گیا ہے۔
10 اہم مقامات کونسے ہیں؟
اعکامیے کے مطابق بلدیہ عظمیٰ کراچی نے 10 اہم مقامات پر اسمارٹ پارکنگ زونز کے قیام کی منظوری دے دی ہے، جن میں سنڈبیڈ گلشنِ اقبال، پارکنگ لاٹ ناظم آباد، کلفٹن سینٹر، سسی آرکیڈ، پیراڈائز سینٹر، پولو گراؤنڈ ڈاکٹر ضیاء الدین احمد روڈ، کرسٹل کورٹ، بیچ ویو پارکنگ کلفٹن کے درمیان پلاٹ، ہائپر اسٹار بیچ ویو پارکنگ کلفٹن، ڈرائیونگ لائسنس برانچ ناظم آباد شامل ہیں۔
اعلامیے کے مطابق اس منصوبے کے نفاذ کے لیے محکمہ چارجڈ پارکنگ نے ٹینڈر جاری کردیئے ہیں اور خریداری کے مراحل کا آغاز بھی کر دیا گیا ہے، پبلک پرائیویٹ پارٹنرشپ ماڈل کے تحت ایکسپریشن آف انٹرسٹ (EOI) طلب کیا گیا ہے تاکہ کراچی کی شہری ترقی میں نجی شعبے کو بھی شامل کیا جا سکے۔
جاری کردہ اعلامیے کے مطابق اسمارٹ پارکنگ سسٹم میں ڈیجیٹل ٹکٹنگ اور بغیر نقد ادائیگی کے آپشنز، پارکنگ کی دستیابی کی معلومات، حقیقی وقت میں کور شدہ علاقوں میں سیکورٹی اور نگرانی کے بہتر انتظامات شامل ہوں گے۔
بلدیہ عظمیٰ کراچی کے مطابق یہ اقدام میئر کراچی بیرسٹر مرتضیٰ وہاب کی قیادت میں عوامی انفرااسٹرکچر کو جدید اور شہری آمدورفت کو بہتر بنانے کے وژن کا حصہ ہے۔ واضح رہے کہ اس سے قبل میئر کراچی نے شہر کے 32 مقامات پر مفت پارکنگ کے اعلان کیا گیا تھا۔
