-
-
سندھ ہائی کورٹ نے شہری کے کراچی کے بجائے جدہ لے جانے کے معاملے میں نجی ایئرلائن اور وفاقی تحقیقاتی ادارے (ایف آئی اے) امیگریشن حکام کو نوٹس دیتے ہوئے ایک ہفتے میں جواب طلب کرلیا۔
نجی ایئرلائن کی جانب سے شہری کو کراچی کے بجائے جدہ لے جانے کے خلاف درخواست پر سندھ ہائی کورٹ میں سماعت ہوئی۔ سندھ ہائی کورٹ کے جسٹس ذوالفقار سانگی نے ریمارکس دیتے ہوئے کہا کہ لگتا ہے درخواست گزار کے ساتھ بڑی زیادتی ہوئی ہے، کیا ایئرلائن کے خلاف کوئی انکوائری ہو رہی ہے؟ ایڈ ووکیٹ نواز ڈاہری نے کہا کہ درخواست گزار کے ساتھ نہ صرف نا انصافی ہوئی ہے بلکہ قومی ساکھ بھی متاثر ہوئی ہے۔
مزید پڑھیں:مسافر کو کراچی کے بجائے جدہ پہنچانے پر نجی ایئرلائن کو لیگل نوٹس
درخواست گزار کے وکیل نے عدالت کو بتایا کہ انکوائری کے معاملے کا علم نہیں ہے۔ جسٹس ذوالفقار سانگی نے ریمارکس دیے کہ لوگ کہتے ہیں ہمیں یہاں سے انصاف نہیں ملتا، ہم صبح سے کیسز کی سماعت کے لیے بیٹھتے ہیں، سو سو کیسز روز سنتے ہیں، اس طرح تو ریگولر بنیچز میں کیسز نہیں چلتے۔ اس کے باوجود لوگ سمجھتے ہیں ان کے ساتھ انصاف نہیں ہو رہا۔
درخواست گزار کے وکیل نے عدالت میں موقف اپنایا کہ ایئر سیال والوں نے شہری کو کراچی کے بجائے جدہ پہنچا دیا، وہاں پر بغیر پاسپورٹ لے جایا گیا، درخواست گزار کو سعودی حکام نے پوچھ گچھ کی اور بیٹھا دیا، شہری کو سعودی حکام نے شہری کو دوبارہ لاہور ڈی پورٹ کر دیا تھا، انتی بڑی لاپرواہی کی گئی ہے، شہری کو سخت پریشانی کا سامنا کرنا پڑا، بغیر پاسپورٹ کو شہری کو کسے دوسرے ملک لے جایا گیا، ایف آئی اے، اور ایمیگریشن حکام کی نا اہلی ہے۔
واضح رہے کہ درخواست گزار شہری ملک شاہ زین نے کراچی کی بجائے جدہ لے جانے پر نجی ایئر لائن کے خلاف درخواست دائر کی تھی۔ درخواست گزار نے درخواست میں سول ایوی ایشن و دیگر کو فریق بنایا تھا جبکہ وکیل نے درخواست میں استدعا کی تھی کہ معاملے پر جے آئی ٹی تشکیل دے کر ہیومن ٹریفکنگ کی تحقیقات بھی کروائی جائیں۔
