بلوچستان اسمبلی کے منتخب نمائندوں کی تنخواہ اور مراعات!

صوبہ بلوچستان میں 2014ء سے دسمبر 2024ء تک پاکستان کے چاروں صوبوں،سینیٹ، قومی اسمبلی، آزاد کشمیر اور گلگت بلتستان میں منتخب نمائندوں کو سب سے زیادہ تنخواہ اور مراعات فراہم کرنے والا صوبہ تھا، تاہم پنجاب اسمبلی، قومی اسمبلی اور سینیٹ آف پاکستان کے بعد اب بلوچستان چوتھے نمبر پر ہے۔ بلوچستان اسمبلی ممبرز تنخواہ و مراعات ایکٹ 1975ء میں آخری بار 2014ء میں ترمیم کرکے نمائندوں کی تنخواہ اور مراعات میں اضافہ کیا گیا تھا۔

ذرائع کے مطابق پنجاب، قومی اسمبلی اور سینیٹ آف پاکستان میں ممبران کے اضافے کے بعد بلوچستان میں عوامی نمائندوں کی تنخواہ اور مراعات میں اضافہ زیر غور ہے، جو 50 سے 100 فیصد تک بتایا جاتاہے۔ یہ اضافہ وزیراعلیٰ، اسپیکر، ڈپٹی اسپیکر، ارکان  اسمبلی ، صوبائی وزراء، مشیر، معاونین خصوصی، پارلیمانی سیکریٹریز اور اپوزیشن لیڈرز کی سرکاری تنخواہوں میں زیر غور ہے، ممکنہ اضافے کے بعد صوبہ بلوچستان ایک مرتبہ پھر چوتھی پوزیشن سے پہلی پوزیشن آسکتاہے۔

اس رپورٹ کے ساتھ منسلک چارٹ میں وزیراعلیٰ بلوچستان، اسپیکر، ڈپٹی اسپیکر، صوبائی وزراء، اپوزیشن لیڈر، مشیر برابر وزیر، پارلیمانی سیکریٹری، ممبران اسمبلی اور معاونین خصوصی کی موجودہ تنخواہ اور مراعات کے اعدادو شمار شامل ہیں۔

مزید پڑھیں؛پنجاب اسمبلی عوامی نمائندوں کی تنخواہ میں نئے اضافے کے بعد پہلی پوزیشن پر

بلوچستان اسمبلی کے منتخب عوامی نمائندوں کو بھی دیگر اسمبلیوں کے عوامی نمائندوں کی طرح کچھ سالانہ اور اجلاس کے دوران روزانہ الائونسز بھی ملتے ہیں، دیگر صوبوں، قومی اسمبلی، سینیٹ ، آزاد کشمیر اسمبلی اور گلگت بلتستان اسمبلی کے مقابلے میں زیادہ ہیں۔