-
-
ملازم کو فائرنگ کر کے زخمی کرنے کے مقدمے میں بشریٰ بی بی اور خاور مانیکا کے بیٹے موسیٰ مانیکا کو آج عدالت پیش کر دیا گیا، اسپیشل مجسٹریٹ نے موسی مانیکا کو جیل بھیج دیا۔
سینئر سول جج مسعود احمد فریدی نے احکامات جاری کرتے ہوئے موسیٰ مانیکا کو 14 روز کے لئے جیل بھیج دیا اور 31 جولائی کو دوباہ پیش کرنے کا حکم دیا۔ واضح رہے کہ سابق خاتونِ اوّل بشریٰ بی بی اور خاور مانیکا کے بیٹے موسیٰ مانیکا پر پاکپتن میں ملازم کو فائرنگ کر کے زخمی کرنے پر اقدامِ قتل کا مقدمہ درج کر لیا گیا ہے۔
پولیس کے مطابق مقدمہ زخمی نوجوان علی بہادر کے والد منظور احمد کی مدعیت میں درج کیا گیا ہے۔ پولیس نے بتایا ہے کہ باپ بیٹا دونوں خاور مانیکا کے گھر ملازم ہیں۔ زخمی نوجوان علی بہادر کے والد نے ایف آئی آر میں الزام عائد کیا ہے کہ بیٹے کے ہاتھ بیڈ کی چادر سے لگے تو ملزم موسیٰ نے فائرنگ کر دی۔
مزید پڑھیں:بشریٰ بی بی کی گرفتاری کیلیے نیب ٹیم خیبر پختونخوا بھجوا دی گئی
پولیس کے مطابق ملزم موسیٰ مانیکا پولیس کی حراست میں ہے۔ اس حوالے سے ڈی پی او پاکپتن کا کہنا ہے کہ ملزم موسیٰ مانیکا کو گرفتار کر کے اسلحہ برآمد کر لیا ہے۔ ڈی پی او پاکپتن کے مطابق ملزم موسیٰ مانیکا کا کہنا ہے کہ اس نے کام میں غفلت برتنے پر ملازم کو فائرنگ کر کے زخمی کیا۔
پولیس کا یہ بھی کہنا ہے کہ موسیٰ مانیکا کی فائرنگ سے زخمی ہونے والے ملازم کی حالت خطرے سے باہر ہے۔
