پاکستانی سافٹ ویئر’سلیش‘کو بین القوامی ہیکرز بریچ کرنے میں ناکام

پشاور کےہونہار نوجوانوں نے عالمی شہرت یافتہ کمپنیوں کے ایتھیکل ہیکرز کو شکست دے دی ۔پاکستانی اسٹارٹ اپ کمپنی کا تیار کردہ’سلیش‘ نامی سافٹ ویئر لاہور اور پشاور میں 30 سے زیادہ ایتھیکل ہیکرز کے سامنے پیش کیا گیاجسے وہ بریچ کرنے میں ناکام رہے۔  

اسٹارٹ اپ کمپنی سکیورٹی وال کے ترجمان بابر اخنذادہ نے انڈپینڈنٹ اردو سے بات کرتے ہوئے بتا یا کہ’یہ پاکستان کی کسی بھی کمپنی کے لیے پہلا اعزاز تھا کہ پاکستانی سافٹ ویئر کو ایسے ایونٹ میں پیش کیا گیا جہاں دنیا کی بڑی کمپنیوں جیسے   Hackerone، Synack، اور Bugcrowd کے نمائندگان شامل تھے لیکن کوئی سافٹ ویئر کی سکیورٹی بریچ نہیں کر سکا جو پاکستان کے ٹیکنالوجی کی دنیا میں ایک بڑا اعزاز ہے۔‘

ایتھیکل ہیکرز میں شامل بین الاقوامی سائبر سکیورٹی کمپنی Synack سے وابستہ محمد جنید  کے مطابق’حیران کن طور پر سلیش ٹھوس اور بہتر طریقے سے بنایا گیا ہے اور تمام ماہرین سافٹ ویئر کو بریچ کرنے میں ناکام رہے اور یہ اس خطے کی ٹیکنالوجی میں جدت کے لیے ایم اہم کڑی ہے۔‘

سلیش سافٹ ویئر سائبر حملوں کو روکنے میں مدد  دینے والا ایک سافٹ ویئر ہے، جسے سرکاری و نجی کمپنیاں استعمال کر سکتی ہیں ۔ دنیا بھر میں 73 فیصد تک سائبر حملے انسانی غلطی کی وجہ سے ہوتے ہیں۔ سلیش سافٹ ویئر ہر وقت سکیورٹی رپورٹ کے ساتھ ساتھ ڈارک ویب کو بھی مانیٹر کرتا ہے۔

بابر اخندذادہ کے مطابق آج کل ڈیجیٹل اثاثے چاہے آپ کا فیس اکاؤنٹ ہوں، بینک اکاؤنٹ یا کسی نیٹ فلیکس یا ایمیزون کا اکاؤنٹ ہیک ہو کر ڈیٹا ڈارک ویب پر فروخت کیا جاتا ہے۔سلیش سافٹ ویئر ڈارک ویب کو بھی مانیٹر کرتا ہے ۔اگر کسی کلائنٹ کمپنی کا ڈیٹا ہیک ہوتا ہے تو اسی وقت کمپنی کو مطلع کیا جاتا ہے تاکہ وہ اپنا پاس ورڈ وغیرہ تبدیل کر لیں اور خود کو محفوظ بنا سکیں ۔‘