Karachi
Current weather
Humidity-
Wind direction-

کراچی میں فالج کے کیسز میں اضافہ

Number of Stroke Patients Increases in Karachi

کراچی میں فالج کے مریضوں کی تعداد میں اضافہ دیکھنے میں آ رہا ہے۔

ایکسپریس نیوز سے گفتگو کرتے ہوئے سول اسپتال کراچی کے ایمرجنسی انچارج ڈاکٹر عمران سرور نے کہا کہ فالج اب صرف عمر رسیدہ افراد تک محدود نہیں رہا بلکہ نوجوان بھی اس کا شکار ہو رہے ہیں جنہیں اکثر بلڈ پریشر یا ذیابیطیس جیسے امراض کا علم ہی نہیں ہوتا یا پھر وہ ادویات میں بے احتیاطی کرتے ہیں۔

انہوں نے بتایا کہ چار ماہ قبل دماغ کی شریان پھٹنے کے کیسز روزانہ رپورٹ نہیں ہوتے تھے لیکن اب روزانہ کی بنیاد پر برین ہیمرج کے مریض آرہے ہیں،اگر جسم کی ایک جانب کمزوری،بولنے میں وقت یا زبان میں لڑکھڑانے کی علامات ظاہر ہوں تو یہ فالج کی ابتدائی علامات کی نشاندہی ہوسکتی ہے۔

فالج کی وجوہات اور احتیاطی تدابیر:

طبی ماہرین کے مطابق فالج کی چند بڑی وجوہات میں ہائی بلڈ پریشر، موٹاپا، شوگر، کم خوراک اور سگریٹ نوشی بھی شامل ہے۔ ڈاکٹر عمران نے عوام سے گزارش کی کہ وہ کھانوں پر ٹیبل سالٹ چھڑکنے، بہت زیادہ نمکین غذا کھانے، اور غیر متحرک طرزِ زندگی سے گریز کریں۔

روزانہ کی سادہ واک اور ورزش آدھے سے زیادہ مریضوں کو فالج سے محفوظ رکھ سکتی ہے۔ طبی ماہرین کے مطابق لوگوں کو صحت مند طرزِ زندگی اپنانے کے ساتھ ساتھ باقاعدگی سے بلڈ پریشر بھی چیک کروانا چاہیے۔

فالج ہونے پر کیا کیا جائے؟

ڈاکٹر عمران سرور نے کہا کہ اگر مریض فالج ہونے کے تین سے ساڑھے چار گھنٹے کے اندر کسی معیاری پہنچ جائے تو مخصوص ادویات اور انجیکشنز دے کر فالج کا اثر ختم کیا جا سکتا ہے۔ لیکن ساڑھے چار گھنٹے کے بعد آنے والے مریضوں کا صرف علامتی علاج کیا جا سکتا ہے۔ ہم تین دن میں ایک سے دو اموات رپورٹ کرتے ہیں۔

مزید پڑھیں:کولیسٹرول کی ذیادتی، بچوں میں بھی ہارٹ ٹیک اور فالج کا خطرہ بڑھ گیا

انہوں نے بتایا کہ فالج کے مریضوں کا بلڈ پریشر اچانک کم کرنا خطرناک ہوتا ہے کیونکہ خون کی روانی پہلے ہی متاثر ہوتی ہے۔ اگر ہم تیزی سے بلڈ پریشر نارمل کریں گے تو دماغ کو مزید نقصان پہنچ سکتا ہے، اس لیے ہم بی پی آہستہ آہستہ کنٹرول کرتے ہیں۔

کراچی میں روزانہ 8 سے 10 فالج کے کیسز رپورٹ

ڈاکٹر عمران کے مطابق پہلے فالج کی زیادہ تر وہ قسم دیکھی جاتی تھی جس میں دماغ کی شریانیں بند ہو جاتی ہیں، مگر اب دماغی شریان پھٹنے (برین ہیمرج) کے کیسز بھی آنا شروع ہوگئے ہیں، جو پہلے نہ ہونے کے برابر تھے۔

میڈیا رپورٹ کے مطابق ڈاکٹر عمران سرور نے کہا کہ تین سے چار ماہ قبل روزانہ صرف 2 سے 3 فالج کے مریض ایمرجنسی میں آتے تھے مگر اب یہ تعداد روزانہ 8 سے 10 تک جا پہنچی ہے جبکہ بعض اوقات ایک دن میں 15 مریض بھی لائے جا رہے ہیں۔

Share this news

Follow Times of Karachi on Google News and explore your favorite content more quickly!
Leave a Reply
Related Posts
Close Button