وزیراعظم نے قومی سلامتی کمیٹی کا اہم اجلاس کل طلب کرلیا

وزیراعظم شہباز شریف نے قومی سلامتی کمیٹی کا اہم اجلاس کل طلب کیا ہے جس میں ایران اسرائیل اور امریکا تنازع پر مشاورت کی جائے گی۔

میڈیا رپورٹس کے مطابق اسرائیل کے بعد امریکا کی جانب سے ایرانی کی ایٹمی تنصیبات پر حملوں کے بعد خطے میں پیدا ہونے والی کشیدہ صورتحال پر وزیراعظم شہباز شریف نے قومی سلامتی کمیٹی کا اہم اجلاس کل (پیر) طلب کر لیا ہے۔

رپورٹس کے مطابق قومی سلامتی کمیٹی کا اجلاس دوپہر 12 بجے وزیراعظم ہاؤس میں ہوگا جس میں عسکری اور سول قیادت شرکت کرے گی۔

مزید پڑھیں؛وزیراعظم شہباز شریف کا ایرانی صدر سے رابطہ، امریکی حملوں کی مذمت

اجلاس میں ایران، اسرائیل اور امریکا تنازع پر مشاورت کی جائے گی جب کہ اجلاس میں ایران کی حمایت سمیت دیگر اہم امور پر بڑے فیصلوں کا بھی امکان ہے۔

اجلاس میں فیلڈ مارشل عاصم منیر اپنے دورہ امریکا پر شرکا کو اعتماد میں لیں گے جب کہ ملکی داخلی اور سرحدی سیکیورٹی صورتحال کا بھی جائزہ لیا جائے گا۔