امریکا میں غیر ملکیوں کیلئے اسٹوڈنٹس ویزہ پر عائد پابندی ختم

امریکی محکمہ خارجہ کی جانب سے غیر ملکیوں کیلئے اسٹوڈنٹس ویزہ پر عائد پابندی اٹھا لی گئی ہے۔

امریکی محکمہ خارجہ نے اسٹوڈنٹ ویزا کے لیے درخواست دینے والے غیر ملکی اسٹوڈنٹس کے لیے معطل عمل کو دوبارہ شروع کر دیا ہے لیکن اب تمام طلبا کو حکومت کے جائزے کے لیے اپنی درخواست کے ساتھ سوشل میڈیا اکاؤنٹس تک رسائی دینا ہو گی۔

اسٹیٹ ڈیپارٹمنٹ نے کہا کہ مئی میں معطل کی گئی اسٹوڈنٹ ویزا پروسیسنگ کو منسوخ کر دیا ہے لیکن دوبارہ درخواست جمع کروانے والے طلبا کو اپنے سوشل میڈیا اکاؤنٹس کو پرائیویسی سیٹنگز سے ہٹا کرعوامی پر سیٹ کرنا ہو گا یا اپنے اکاؤنٹ کے مواد کو دیکھنے کی اجازت دینا ہو گی، ایسا کرنے سے انکار اس بات کی علامت ہو گی کہ وہ اپنی آن لائن سرگرمی کو چھپانے کی کوشش کر رہے ہیں، تو ایسے طلبا کے ویزہ کو مسترد کیا جائے گا۔

مزید پڑھیں:کویت نے 19 سال بعد پاکستانی شہریوں کو ویزوں کا اجرا شروع کردیا

اسٹیٹ ڈیپارٹمنٹ نے کہا کہ نئی گائیڈ لائنز کے تحت، قونصلر افسران تمام اسٹوڈنٹس اور ایکسچینج وزیٹر کی درخواست دینے والوں کی جامع اور مکمل جانچ کریں گے، سوشل میڈیا کی جانچ اس بات کو یقینی بنائے گی کہ ہم اپنے ملک کا دورہ کرنے کی کوشش کرنے والے ہر فرد کی مناسب طریقے سے اسکریننگ کر رہے ہیں۔

خیال رہے کہ امریکا نے گزشتہ ماہ غیرملکی اسٹوڈنٹس کو ویزہ دینے پر پابندی عائد کردی تھی، فیصلے کا مقصد امیگریشن کنٹرول سخت کرنا اور داخلی پالیسیوں کو ترجیح دینا تھا، اس سے قبل بھی بعض ممالک سے تعلق رکھنے والے طلبہ پرتعلیمی اداروں میں داخلے کی پابندی عائد کی گئی تھی۔