عید الاضحیٰ پر کراچی سمیت سندھ بھر میں شدید گرمی کی پیشگوئی

محکمہ موسمیات نے عید الاضحیٰ کے موقع پر کراچی سمیت سندھ کے بیشتر علاقوں میں شدید گرمی کی پیشگوئی کی ہے۔ آج کراچی میں موسم گرم اور مرطوب رہنے کا امکان ہے جبکہ ہلکی سمندری ہوائیں دن بھر چلتی رہیں گی۔

محکمہ موسمیات کے مطابق شہر قائد میں کل سے گرمی کی شدت میں بتدریج اضافہ ہوگا اور زیادہ سے زیادہ درجہ حرارت 37 ڈگری سینٹی گریڈ تک پہنچ سکتا ہے۔ مرطوب موسم کے باعث گرمی زیادہ محسوس کی جائے گی، تاہم شام اور رات کے اوقات میں سمندری ہواؤں کے سبب موسم میں کچھ بہتری آسکتی ہے۔

مزید پڑھیں؛کراچی میں عیدالاضحیٰ پر گیس کی فراہمی کا شیڈول جاری

کراچی کا موجودہ درجہ حرارت 34 ڈگری سینٹی گریڈ ریکارڈ کیا گیا ہے جبکہ ہوا میں نمی کا تناسب 43 فیصد ہے۔ جنوب مغربی سمت سے 19 کلومیٹر فی گھنٹہ کی رفتار سے ہوائیں چل رہی ہیں۔

محکمہ موسمیات کے مطابق آئندہ دو روز کے دوران سندھ کے میدانی اضلاع شدید گرمی کی لپیٹ میں رہیں گے اور درجہ حرارت میں 5 ڈگری سینٹی گریڈ تک اضافے کا امکان ہے۔