-
-
کراچی واٹر اینڈ سیوریج کارپوریشن نے شہر کی ترقی شفافیت اور بلنگ نظام کی مزید بہتری کے لیے ایک مؤثر اور انقلابی حکمت عملی کا آغاز کردیا
اس حوالے سے میئر کراچی بیرسٹر مرتضیٰ وہاب اور سی ای او واٹر کارپوریشن احمد علی صدیقی کے احکامات کے نتیجے میں جدید ڈیجیٹل بلنگ سسٹم کا نفاذ کیا گیا ہے جس سے غیر رجسٹرڈ صارفین مستفید ہو سکیں گے۔
ڈائریکٹر بلنگ واٹر کارپوریشن، محسن ذوالفقار قائم خانی کے مطابق، وہ تمام صارفین جو کسی بھی وجہ سے تاحال واٹر کارپوریشن کے نظام میں شامل نہیں ہو سکے تھے اب صرف اپنا قومی شناختی کارڈ اور ملکیت کے دستاویزات جمع کرا کر بآسانی بلنگ سسٹم کا حصہ بن سکتے ہیں۔
اس سلسلے میں ون ونڈو آپریشن کے تحت ایک مربوط نظام متعارف کرایا گیا ہے جس کے ذریعے شہریوں کا اندراج جدید ڈیجیٹل بلنگ سسٹم میں تیزی سے ممکن بنایا جائے گا۔
مزید پڑھیں؛ واٹر کارپوریشن نے کراچی کے اسپتالوں کو پانی کی فراہمی کے لیے ہنگامی منصوبہ ترتیب دے دیا
انہوں نے بتایا کہ ہائی رائز بلڈنگز کے وہ یونٹس جن میں 75 فیصد سے زیادہ رہائش پذیر ہو چکے ہیں ان کے لیے انفرادی بلنگ کی سہولت بھی شروع کردی گئی ہے تاکہ ہر رہائشی کو براہ راست اور منصفانہ انداز میں سروسز فراہم کی جا سکیں۔
رہائشی، تجارتی اور ادارہ جاتی پراپرٹیز کی درجہ بندی
اس کے علاوہ واٹر کارپوریشن نے رہائشی تجارتی اور ادارہ جاتی پراپرٹیز کی علیحدہ درجہ بندی کرنے کا بھی فیصلہ کیا ہے جس کا مقصد ہر صارف کو اس کی نوعیت اور ضروریات کے مطابق سہولت فراہم کرنا ہے۔
صارفین کو ہدایت کی گئی ہے کہ وہ واٹر کارپوریشن کے مرکزی دفتر کارساز میں واقع بلاک اے 9 میل شارع فیصل پر رجوع کریں اور جلد اپنا کنکشن رجسٹرڈ کروائیں۔
ترجمان واٹر کارپوریشن کے مطابق یہ تمام اقدامات شہر کے وسیع تر مفاد میں کیے جا رہے ہیں جبکہ اس جدید نظام کا مقصد بلنگ کے عمل کو شفاف منصفانہ اور پائیدار بنانا ہے تاکہ شہریوں کو بہتر بروقت اور مؤثر سہولیات فراہم کی جا سکیں۔
