محکمۂ موسمیات نے ہیٹ ویو کا الرٹ جاری کردیا

محکمۂ موسمیات نے مئی میں گرمی کی پہلی لہر کا امکان ظاہر کردیا ہے، 15 سے 20 مئی کے دوران سندھ سمیت ملک کے بیشتر مقامات ہیٹ ویو کی لپیٹ میں رہ سکتے ہیں۔

محکمۂ موسمیات کی جانب سے جاری الرٹ کے مطابق 15 مئی سے ہوا کا دباؤ ملک کے بیشتر مقامات پر اثرانداز ہو سکتا ہے، 15 سے 20 مئی کے دوران سندھ، بلوچستان اور جنوبی پنجاب میں دن کا درجۂ حرارت معمول سے 4 سے 6 ڈگری سینٹی گریڈ زیادہ رہنے کا امکان ہے۔

محکمۂ موسمیات کا کہنا ہے کہ 15 سے 19 مئی کے دوران ملک کے بالائی علاقوں میں دن کا درجۂ حرارت معمول سے 5 سے 7 ڈگری سینٹی گریڈ زیادہ رہنے کا امکان ہے، 19 مئی سے مغربی ہواؤں کا سلسلہ ملک کے بالائی علاقوں میں داخل ہو سکتا ہے۔

مزید پڑھیں:کراچی میں آج بھی گرمی کی لہر، پارہ معمول سے 7 ڈگری تک زائد رہنے کا امکان

19 سے 20 مئی کے دوران ملک کے بالائی علاقوں میں آندھی اور گرج چمک کے ساتھ بارش متوقع ہے جبکہ چند مقامات پر موسلا دھار بارش اور ژالہ باری بھی ہو سکتی ہے۔ یاد رہے محکمہ موسمیات ارلی وارننگ سینٹر کی جانب سے پیش گوئی کی گئی تھی کہ اگلے 3 روز کے دوران کراچی کا موسم گرم و مرطوب رہنے کا امکان ہے۔

شہر کا زیادہ سے زیادہ درجہ حرارت 34 تا 36 ڈگری کے درمیان ریکارڈ ہو سکتا ہے تاہم صبح و شام کے وقت نمی کا تناسب زیادہ رہنے کے سبب اصل درجہ حرارت سے زیادہ گرمی محسوس کی جا سکتی ہے۔

Web Desk