کراچی کے علاقے اورنگی ٹاؤن میں فائرنگ سے مسجد کا مؤذن اور نعت خواں جاں بحق

کراچی کے علاقے اورنگی ٹاؤن میں نامعلوم افراد کی فائرنگ سے نعت خواں جاں بحق ہوگیا۔ مقتول علاقے کی مسجد میں موذن اور نعت خوانی کیا کرتا تھا۔

میڈیا رپورٹس کے مطابق کراچی ویسٹ پولیس کا کہنا ہے کہ اورنگی ٹاؤن میں فائرنگ سے ایک شخص کی ہلاکت ہوئی ہے اور مقتول کی شناخت رحیم اللہ عطاری کے نام سے ہوئی ہے۔

پولیس کے مطابق مقتول علاقے کی مسجد میں مؤذن  اور نعت خوانی کیا کرتا تھا۔ پولیس کا کہنا تھا کہ نعت خوانی کی تقریب میں شرکت کیلئے جاتے ہوئے پاکستان بازار میں دو موٹر سائیکل سوار ملزمان نے رحیم اللہ عطاری پر فائرنگ کردی تھی۔

پولیس کا کہنا تھا کہ لواحقین نے بتایا ہے کہ مقتول کی کسی سے دشمنی نہیں تھی، مقتول کا 6 ماہ کا ایک بیٹا بھی ہے۔

پولیس کے مطابق مقتول کے پاس موبائل فون اور دیگر سامان موجود ہے، واقعے کی جگہ سے نائن ایم ایم گولی کا ایک خول ملا ہے۔ بظاہر واقعہ ٹارگٹ کلنگ کا لگتا ہے، واقعہ کی تحقیقات شروع کردی ہے۔