کراچی میں لین دین کے تنازع پر 22 سالہ نوجوان تشدد سے جاں بحق، 4 ملزمان گرفتار

کراچی میں ناگن چورنگی کے قریب بااثر افراد نے اپنے رینٹ اے کار کے دفتر میں ایک شخص کو شدید تشدد کا نشانہ بناکر بند کردیا جہاں پر متاثرہ شخص جاں بحق ہوگیا۔

میڈیا رپورٹس کے مطابق گزشتہ روز پیش آنے والے واقع کی ویڈیو سوشل میڈیا پر وائرل ہوئی جسکے بعد پولیس نے فوری کارروائی کرتے ہوئے 4 ملزمان کو گرفتار کیا جبکہ دیگر کی تلاش جاری ہے۔ مقتول اور ملزمان کے درمیان ابتدائی طور پر لین دین کا تنازع سامنے آیا ہے۔

وائرل ویڈیو میں کچھ لوگوں کو  نوجوان پر بدترین تشدد کرتے دیکھا جاسکتا ہے، ملزمان متاثرہ شخص پر ڈنڈے، کیل لگے ڈنڈے اور بیلٹ سے تشدد کررہے ہیں، ملزمان نے متاثرہ شخص کو برہنہ کرکے بھی شدید تشدد کا نشانہ بنایا۔ ملزمان مقتول کو رینٹ اے کار کے دفتر میں بند کرکے چلے گئے، مقتول زخموں کی تاب نہ لاتےہوئےدم توڑگیا۔

پولیس کےمطابق واقعہ کی اطلاع ملتےہی پولیس کی بھاری نفری جائےوقوعہ پرپہنچ گئی اوررینٹ اےکارکےدفترسےلاش برآمدکرلی گئی،موقع واردات سےشواہداکٹھےکرلئےہیں،لاش کوضروری کارروائی کیلئےہسپتال منتقل کردیاگیاہے،مقتول کی شناخت عدیل کےنام سےہوئی ہے۔

ایس ایچ او سرسید پولیس اسٹیشن شاہد تاج نے میڈیا سے گفتگو کرتے ہوئے بتایا کہ واقعہ میں ملوث ملزمان کا مقتول سے لین دین کا تنازع لگتا ہے، مقتول عدیل پر تشدد کے بعد  اسے دفتر میں بند کرکے چلے گئے جہاں وہ دم توڑ گیا، مقتول پر تشدد کرنے والے کسی ملزم کی کسی سیاسی شخصیت سے تعلق کی تصدیق نہیں ہوئی۔