-
-
فرانس کے دارالحکومت پیرس میں کھٹملوں کی بڑی تعداد نے حملہ آور ہوتے ہوئے خوف وہراس پھیلا دیا۔ اگلے برس پیرس میں شیڈول اولمپک مقابلوں پر بھی سوالات اٹھنے لگ گئے۔
فرانس میں اگلے سال ہونے والے اولمپک گیمز 2024 سے قبل خون چوسنے والے کیڑے کھٹمل نے دارالحکومت پیرس سمیت دیگر شہروں میں ہر جگہ ہلچل مچا دی ہے جس کی وجہ سے سیاحوں سمیت مقامی لوگوں کی زندگی اجیرن ہوگئی ہے۔
انٹرنیشنل میڈیا پر کھٹملوں کے پھیلنے کی خبر اس وقت وائرل ہوئی جب کچھ روز قبل سماجی پلیٹ فارم ’ایکس‘ پر سیاحوں نے ایئرپورٹ اور بسوں پر کھٹملوں کی موجودگی کی ویڈیوز شیئر کیں۔
ویڈیو سوشل میڈیا پر وائرل ہونے کے بعد یہ بھی انکشاف ہوا کہ کھٹمل پیرس کے ایئرپورٹس، میٹرو اسٹیشن، ہوٹل کے کمروں، سنیما گھروں اور پبلک بسوں اور ٹرین میں بھی دیکھے گئے۔
پیرس سٹی ہال نے 2024 کے اولمپک کھیلوں سے قبل اس مسئلے سے نمٹنے کے لیے حکومت سے فوری کارروائی کا مطالبہ کیا ہے۔
پیرس کے ڈپٹی میئر ایمانوئیل گریگوئر نے وزیر اعظم الزبتھ بورن سے اس مسئلے کو حل کرنے کے لیے ایک کانفرنس کا انعقاد کرنے کی درخواست کرتے ہوئے کہا کہ یہ ’عوامی صحت‘ کے لیے خطرے کا باعث بن سکتا ہے۔
فرانسیسی ماہر جین مشیل بیرینجر کا کہنا ہے کہ گرمیوں کے سیزن کے آخر میں کھٹملوں کی تعداد میں ہمیشہ نمایاں اضافہ ہوتا ہے، اس کی وجہ یہ ہے کہ جولائی اور اگست میں لوگ بہت زیادہ سفر کرتے ہیں جس کی وجہ سے وہ اپنے سامان میں کھٹمل بھی ساتھ لاتے ہیں۔ ہر سال اس موسم کے دوران کھٹملوں کی تعداد میں اضافہ پچھلے سال سے بھی زیادہ ہوتا ہے۔
فرانسیسی حکام فی الحال کھٹملوں سے نمٹنے کے لیے حکمت عملی پر بات کر رہے ہیں۔ اس کے علاوہ فرانسیسی صدر ایمانوئیل میکرون پہلے ہی ایک ٹاسک فورس تشکیل دے چکے ہیں۔
نیشنل سوشل سیکیورٹی ایڈمنسٹریشن نے پہلے ہی کچھ ایسے عوامل کو کم کر دیا ہے جو ان کھٹملوں کے انفیکشن کا باعث بن سکتے ہیں۔
رپورٹ کے مطابق وزیر اعظم الزبتھ بورن کو لکھے گئے ایک خط میں پیرس سٹی ہال نے لکھا کہ کھٹمل انسان کی صحت کے لیے اہم مسئلہ ہے، ان کے خاتمے کے لیے ایکشن پلان ترتیب دیا جائے، کیوں کہ اگلے سال فرانس 2024 میں اولمپک گیمز کی میزبانی بھی کرے گا۔
