ابوظہبی میں واٹس ایپ پر ایک مرد کو توہین آمیز پیغام بھیجنے پر خاتون پر جرمانہ عائد

متحدہ عرب امارات کی ریاست ابوظہبی میں ایک خاتون پر واٹس ایپ کے ذریعے مرد کو توہین آمیز پیغام بھیجنے پر جرمانہ عائد کیا گیا ہے۔ جرمانہ ابوظہبی کی فیملی کورٹ کی جانب سے عائد کیا گیا ہے۔

میڈیا رپورٹس کے مطابق ابوظہبی میں ایک شخص نے عدالت سے رجوع کیا اور خاتون پر توہین آمیز پیغام بھیجنے پر ہرجانے کا دعویٰ دائر کیا تھا۔

ہرجانے کا دعویٰ دائر کرنے والے شخص نے عدالت میں اپنے بیان میں کہا کہ خاتون اس کے گھر میں بغیر اجازت داخل ہوئی اور اس کی گاڑی کی تلاشی لی۔ بعد ازاں واٹس اپ پر نامناسب پیغام بھیجا جس سے اسے شدید ذہنی اذیت پہنچی۔ خاتون کو 15 ہزار درہم نیزعدالتی اخراجات ادا کرنے کا حکم صادر کیا جائے۔

رپورٹس کے مطابق عدالت میں خاتون کا واٹس اپ پر بھیجا گیا پیغام بھی پیش کیا۔ خاتون نے جوابی دعوے میں ہراساں کرنے کا الزام عائد کیا جسے مسترد کردیا گیا۔

عدالت نے فیصلے میں کہا  خاتون کا گھر میں بغیر اجازت داخل  ہونے کے علاوہ کار کی تلاشی لینا اورسوشل میڈیا کے ذریعے نامناسب پیغام ارسال کرنا قطعی درست نہیں جس سے پیغام وصول کرنے والے کی توہین ہوئی ہے۔ عدالت خاتون کو متاثرہ شخص کو 2 ہزار درہم اور مقدمے کے تمام اخراجات ادا کرنے کا حکم دیتی ہے۔